pahle to jaanchta hun tumhaari nazar ko main

pahle to jāñchtā huuñ tumhārī nazar ko maiñ

phir dekhtā huuñ ġhaur se apne jigar ko maiñ

ab dil kā ġham uThā.ūñ ki ro.uuñ jigar ko maiñ

mashkūk pā rahā huuñ kisī kī nazar ko maiñ

sun kar navā-e-ishq-o-mohabbat kī iltijā

lo chheḌtā huuñ aaj rabāb-e-asar ko maiñ

terī tarah karūñgā garebāñ ko chāk-chāk

detā huuñ ye payām tulū-e-sahar ko maiñ

jis rahguzar pe ishq ke aañsū Dhalak paḌe

hasrat se tak rahā huuñ usī rahguzar ko maiñ

rahbar banā thā vādī-e-ġhurbat meñ jo kabhī

manzil pe DhūñDhtā huuñ usī rāhbar ko maiñ

jis se husūl-e-aish-o-masarrat muhāl hai

suntā huuñ fart-e-yās se aisī ḳhabar ko maiñ

maanā ki apne dil pe mujhe iḳhtiyār hai

lekin dabā ke rakh na sakūñgā nazar ko maiñ

ai tīr-e-nāz-e-yār tavajjoh se kaam le

be-rang pā rahā huuñ nuqūsh-e-jigar ko maiñ

dil ke alāva aur mire paas kuchh nahīñ

ye de ke bhejtā huuñ 'vafā' nāma-bar ko maiñ

pahle to jaanchta hun tumhaari nazar ko main

phir dekhta hun ghaur se apne jigar ko main

ab dil ka gham uThaun ki roun jigar ko main

mashkuk pa raha hun kisi ki nazar ko main

sun kar nawa-e-ishq-o-mohabbat ki iltija

lo chheDta hun aaj rabab-e-asar ko main

teri tarah karunga gareban ko chaak-chaak

deta hun ye payam tulu-e-sahar ko main

jis rahguzar pe ishq ke aansu Dhalak paDe

hasrat se tak raha hun usi rahguzar ko main

rahbar bana tha wadi-e-ghurbat mein jo kabhi

manzil pe DhunDhta hun usi rahbar ko main

jis se husul-e-aish-o-masarrat muhaal hai

sunta hun fart-e-yas se aisi KHabar ko main

mana ki apne dil pe mujhe iKHtiyar hai

lekin daba ke rakh na sakunga nazar ko main

ai tir-e-naz-e-yar tawajjoh se kaam le

be-rang pa raha hun nuqush-e-jigar ko main

dil ke alawa aur mere pas kuchh nahin

ye de ke bhejta hun 'wafa' nama-bar ko main