pahle to shahr bhar mein andhera kiya gaya

pahle to shahr bhar meñ añdherā kiyā gayā

phir ham se raushnī kā taqāzā kiyā gayā

pahle to sāzishoñ se hameñ dī ga.ī shikast

phir ḳhuub is shikast kā charchā kiyā gayā

ik shaḳhs ke liye mirī bastī kā rāsta

kachche makāñ girā ke kushāda kiyā gayā

pahle to mujh ko raah batā.ī ga.ī ġhalat

phir merī gumrahī kā tamāshā kiyā gayā

duniyā na thī jo pyaar ke qābil to kis liye

ham ko asīr-e-ḳhvāhish-e-duniyā kiyā gayā

is gulshan-e-hayāt meñ rañg-e-ḳhizāñ ke saath

ik mausam-e-bahār bhī paidā kiyā gayā

āñkhoñ ko āñsuoñ ke javāhar diye ga.e

dil ke sipurd ġham kā ḳhazāna kiyā gayā

duniyā hamāre qatl ko kahtī hai ḳhud-kushī

marne ke baa'd bhī hameñ rusvā kiyā gayā

'shāhid' likhā gayā thā hamāre hī ḳhuun se

tasnīf jab vafā kā sahīfa kiyā gayā

pahle to shahr bhar mein andhera kiya gaya

phir hum se raushni ka taqaza kiya gaya

pahle to sazishon se hamein di gai shikast

phir KHub is shikast ka charcha kiya gaya

ek shaKHs ke liye meri basti ka rasta

kachche makan gira ke kushada kiya gaya

pahle to mujh ko rah batai gai ghalat

phir meri gumrahi ka tamasha kiya gaya

duniya na thi jo pyar ke qabil to kis liye

hum ko asir-e-KHwahish-e-duniya kiya gaya

is gulshan-e-hayat mein rang-e-KHizan ke sath

ek mausam-e-bahaar bhi paida kiya gaya

aankhon ko aansuon ke jawahar diye gae

dil ke sipurd gham ka KHazana kiya gaya

duniya hamare qatl ko kahti hai KHud-kushi

marne ke ba'd bhi hamein ruswa kiya gaya

'shahid' likha gaya tha hamare hi KHun se

tasnif jab wafa ka sahifa kiya gaya