pahle wo achanak nazar aaya use dekha

pahle vo achānak nazar aayā use dekhā

phir dil ne kiyā aur taqāzā use dekhā

vo husn baḌī der rahā sāmne mere

phir maiñ ne miyāñ jis tarah chāhā use dekhā

vo pal to mirī aañkh se jaatā hī nahīñ hai

ik roz darīche se maiñ jhāñkā use dekhā

vo husn ke meyār pe puurā thā bahar-taur

dekhā hī nahīñ koī bhī jaisā use dekhā

ik shaam vo kuchh aisā khulā aisā khulā bas

jaisā maiñ samajhtā thā so vaisā use dekhā

dariyā sā samundar meñ utarne ko thā betāb

utrā use dekhā jo vo Duubā use dekhā

chhāyā hai ḳhayāloñ meñ 'sa.īd' aisā koī shaḳhs

lagtā hai ki jis ne mujhe dekhā use dekhā

pahle wo achanak nazar aaya use dekha

phir dil ne kiya aur taqaza use dekha

wo husn baDi der raha samne mere

phir main ne miyan jis tarah chaha use dekha

wo pal to meri aankh se jata hi nahin hai

ek roz dariche se main jhanka use dekha

wo husn ke meyar pe pura tha bahar-taur

dekha hi nahin koi bhi jaisa use dekha

ek sham wo kuchh aisa khula aisa khula bas

jaisa main samajhta tha so waisa use dekha

dariya sa samundar mein utarne ko tha betab

utra use dekha jo wo Duba use dekha

chhaya hai KHayalon mein 'said' aisa koi shaKHs

lagta hai ki jis ne mujhe dekha use dekha