pahle wo qaid-e-marg se mujhko riha kare

pahle vo qaid-e-marg se mujh ko rihā kare

phir ho to bevafā.ī kā be-shak gila kare

ab kashmakash ke bojh kī tāqat nahīñ rahī

ab dil meñ koī aas na jaage ḳhudā kare

ho sham.a to batā.e ki jalte haiñ kis tarah

jugnū bhī mar ga.e hoñ to parvāna kyā kare

vo hukm de rahe haiñ magar sochte nahīñ

kis tarah koī dil ko jigar se judā kare

vo mushta.il ki zid kī bhī hai intihā koī

ham muntazir ki aaj magar ibtidā kare

andar kā baaġh jis kā badal jaa.e dasht meñ

vo shaḳhs tere phuul se chehre ko kyā kare

ḳhairāt bhī milī na jahāñ se tamām umr

'aḳhtar' vahīñ pe aaj bhī baiThā duā kare

pahle wo qaid-e-marg se mujh ko riha kare

phir ho to bewafai ka be-shak gila kare

ab kashmakash ke bojh ki taqat nahin rahi

ab dil mein koi aas na jage KHuda kare

ho shama to batae ki jalte hain kis tarah

jugnu bhi mar gae hon to parwana kya kare

wo hukm de rahe hain magar sochte nahin

kis tarah koi dil ko jigar se juda kare

wo mushtail ki zid ki bhi hai intiha koi

hum muntazir ki aaj magar ibtida kare

andar ka bagh jis ka badal jae dasht mein

wo shaKHs tere phul se chehre ko kya kare

KHairaat bhi mili na jahan se tamam umr

'aKHtar' wahin pe aaj bhi baiTha dua kare