pahlu mein dil hai dard-e-mohabbat liye hue

pahlū meñ dil hai dard-e-mohabbat liye hue

baiThā huuñ kā.enāt kī daulat liye hue

is husn-e-ishva-gar se farishte na bach sake

hai aadmī to phir bashariyyat liye hue

allāh re ġhubār guzargāh-e-yār kā

hai zarra zarra tuur kī azmat liye hue

hogī qubūl dāvar-e-mahshar ye pesh-kash

aayā huuñ maiñ matā.a-e-nadāmat liye hue

hoñ bāryāb-e-bazm vo saa.at kab aa.egī

muddat guzar chukī hai ijāzat liye hue

hālāñki muskurāte haiñ vo vaqt-e-guftugū

lahja magar hai saaf kudūrat liye hue

mar kar bhī gul-ruḳhoñ se judā.ī na ho sakī

phūloñ kā Dher hai mirī turbat liye hue

gumnām thā to kunj-e-qanā.at nasīb thā

phirtī hai chār-sū mirī shohrat liye hue

har gosha mere qalb kā maidān-e-hashr hai

hai muḳhtasar makān ye vus.at liye hue

naale nikal ke dil se agar arsh tak ga.e

jā.eñge ai falak ye tirī chhat liye hue

ik hūr-vash ke kūche kā 'sābir' hai dil pe naqsh

baiThā huuñ maiñ kanār meñ jannat liye hue

pahlu mein dil hai dard-e-mohabbat liye hue

baiTha hun kaenat ki daulat liye hue

is husn-e-ishwa-gar se farishte na bach sake

hai aadmi to phir bashariyyat liye hue

allah re ghubar guzargah-e-yar ka

hai zarra zarra tur ki azmat liye hue

hogi qubul dawar-e-mahshar ye pesh-kash

aaya hun main mataa-e-nadamat liye hue

hon baryab-e-bazm wo saat kab aaegi

muddat guzar chuki hai ijazat liye hue

haalanki muskuraate hain wo waqt-e-guftugu

lahja magar hai saf kudurat liye hue

mar kar bhi gul-ruKHon se judai na ho saki

phulon ka Dher hai meri turbat liye hue

gumnam tha to kunj-e-qanaat nasib tha

phirti hai chaar-su meri shohrat liye hue

har gosha mere qalb ka maidan-e-hashr hai

hai muKHtasar makan ye wusat liye hue

nale nikal ke dil se agar arsh tak gae

jaenge ai falak ye teri chhat liye hue

ek hur-wash ke kuche ka 'sabir' hai dil pe naqsh

baiTha hun main kanar mein jannat liye hue