pahunch gaya tha wo kuchh itna raushni ke qarib

pahuñch gayā thā vo kuchh itnā raushnī ke qarīb

bujhā charāġh to palTā na tīrgī ke qarīb

sulagtī ret pe bhī us kā hausla dekho

huī na pyaas kabhī ḳhema-zan namī ke qarīb

badan ke dasht meñ jab dafn ho gayā ehsās

vafā phaTaktī bhalā kaise aadmī ke qarīb

hamārī pyaas ke sūraj ne Daal kar kirneñ

kiyā hai gahre samundar ko tishnagī ke qarīb

jo zaḳhm-e-dil ko rafū kar rahā thā ashkoñ se

hamāre ba.ad na dekhā gayā kisī ke qarīb

bashar ne chāñd sitāroñ ko chhū liyā lekin

ye aadmī na kabhī aayā aadmī ke qarīb

hamāre bachchoñ ke lab pyaas se haiñ jhulse hue

hamārī laash bhī rakhnā na tum namī ke qarīb

ye kis ke naam se baḌhtī haiñ dhaḌkaneñ dil kī

ye kaun hai mire ehsās-e-zindagī ke qarīb

pahunch gaya tha wo kuchh itna raushni ke qarib

bujha charagh to palTa na tirgi ke qarib

sulagti ret pe bhi us ka hausla dekho

hui na pyas kabhi KHema-zan nami ke qarib

badan ke dasht mein jab dafn ho gaya ehsas

wafa phaTakti bhala kaise aadmi ke qarib

hamari pyas ke suraj ne Dal kar kirnen

kiya hai gahre samundar ko tishnagi ke qarib

jo zaKHm-e-dil ko rafu kar raha tha ashkon se

hamare baad na dekha gaya kisi ke qarib

bashar ne chand sitaron ko chhu liya lekin

ye aadmi na kabhi aaya aadmi ke qarib

hamare bachchon ke lab pyas se hain jhulse hue

hamari lash bhi rakhna na tum nami ke qarib

ye kis ke nam se baDhti hain dhaDkanen dil ki

ye kaun hai mere ehsas-e-zindagi ke qarib