pahunche na jo murad ko wo muddaa hun main

pahuñche na jo murād ko vo mudda.ā huuñ maiñ

nākāmiyoñ kī raah meñ ḳhud kho gayā huuñ maiñ

kahte haiñ jis ko husn usī kā hai naam ishq

dekho mujhe ba-ġhaur ki shān-e-ḳhudā huuñ maiñ

parda uThā ki hosh kī duniyā badal ga.ī

hairān huuñ ki sāmne kyā dekhtā huuñ maiñ

paivand ḳhaak ho ke mileñ sar-bulandiyāñ

dasht-e-junūñ meñ ban ke bagūlā uḌā huuñ maiñ

vaa.iz ke pand-o-va.az kā itnā asar to hai

jo kuchh bhī aaj us ne kahā pī gayā huuñ maiñ

samjhe mirī haqīqat-e-hastī koī 'ratan'

ain-e-fanā kī shakl meñ ain-e-baqā huuñ maiñ

pahunche na jo murad ko wo muddaa hun main

nakaamiyon ki rah mein KHud kho gaya hun main

kahte hain jis ko husn usi ka hai nam ishq

dekho mujhe ba-ghaur ki shan-e-KHuda hun main

parda uTha ki hosh ki duniya badal gai

hairan hun ki samne kya dekhta hun main

paiwand KHak ho ke milen sar-bulandiyan

dasht-e-junun mein ban ke bagula uDa hun main

waiz ke pand-o-waz ka itna asar to hai

jo kuchh bhi aaj us ne kaha pi gaya hun main

samjhe meri haqiqat-e-hasti koi 'ratan'

ain-e-fana ki shakl mein ain-e-baqa hun main