pahunchega mohabbat ka yun anjam kahan tak

pahuñchegā mohabbat kā yuuñ anjām kahāñ tak

mujh par vo lagāte rahe ilzām kahāñ tak

manzil bhī nazar aane lagī aage hī aage

do gaam chalūñ aur vo do gaam kahāñ tak

ham girya-e-shabnam kī taraf dekh rahe haiñ

kaliyoñ ke tabassum kā hai paiġhām kahāñ tak

ham bāda-e-ulfat haiñ so hāthoñ se hamāre

chhīnegā mohabbat ke koī jaam kahāñ tak

ye koī batā saktā nahīñ hai kabhī 'qaisar'

mā'lūm nahīñ hijr kī hai shaam kahāñ tak

pahunchega mohabbat ka yun anjam kahan tak

mujh par wo lagate rahe ilzam kahan tak

manzil bhi nazar aane lagi aage hi aage

do gam chalun aur wo do gam kahan tak

hum girya-e-shabnam ki taraf dekh rahe hain

kaliyon ke tabassum ka hai paigham kahan tak

hum baada-e-ulfat hain so hathon se hamare

chhinega mohabbat ke koi jam kahan tak

ye koi bata sakta nahin hai kabhi 'qaisar'

ma'lum nahin hijr ki hai sham kahan tak