pahuncha diya hai josh-e-talab ne kahan mujhe

pahuñchā diyā hai josh-e-talab ne kahāñ mujhe

lagtā hai har maqām tirā āstāñ mujhe

ālām-e-rozgār meñ bhī dilkashī rahe

mil jaa.e aap sā jo koī mehrbāñ mujhe

maiñ be-niyāz-e-rahbar-o-rahzan huuñ ai nadīm

kyoñ dekhtā hai ġhaur se har kārvāñ mujhe

taḳhlīq-e-kā.enāt kā bā'is tumhīñ to ho

tum mil ga.e to mil ga.e donoñ jahāñ mujhe

qaa.em ḳhudī ke saath hai rang-e-ta.a.yyunāt

phir maiñ kahāñ agar huā irfān-e-jāñ mujhe

ālām-e-rahguzār-e-mohabbat na pūchhiye

har gaam par mile haiñ lahū ke nishāñ mujhe

kuchh aur ai tajallī-e-jānāñ mujhe navāz

himmat abhī nazar nahīñ aatī javāñ mujhe

ai chārāgar ‘ilāj kī zahmat na kījiye

raas aa ga.ī amānat-e-dard-e-nihāñ mujhe

ye kaun sā maqām-e-mohabbat hai ai 'bahār'

hone lagā hai ḳhud pe bhī un kā gumāñ mujhe

pahuncha diya hai josh-e-talab ne kahan mujhe

lagta hai har maqam tera aastan mujhe

aalam-e-rozgar mein bhi dilkashi rahe

mil jae aap sa jo koi mehrban mujhe

main be-niyaz-e-rahbar-o-rahzan hun ai nadim

kyon dekhta hai ghaur se har karwan mujhe

taKHliq-e-kaenat ka ba'is tumhin to ho

tum mil gae to mil gae donon jahan mujhe

qaem KHudi ke sath hai rang-e-tayyunat

phir main kahan agar hua irfan-e-jaan mujhe

aalam-e-rahguzar-e-mohabbat na puchhiye

har gam par mile hain lahu ke nishan mujhe

kuchh aur ai tajalli-e-jaanan mujhe nawaz

himmat abhi nazar nahin aati jawan mujhe

ai chaaragar ‘ilaj ki zahmat na kijiye

ras aa gai amanat-e-dard-e-nihan mujhe

ye kaun sa maqam-e-mohabbat hai ai 'bahaar'

hone laga hai KHud pe bhi un ka guman mujhe