paikar-e-lala-o-gul hai use patthar na kaho

paikar-e-lāla-o-gul hai use patthar na kaho

vo hai mahbūb mirā us ko sitamgar na kaho

ye to sach hai ki ḳhudā ne hai diyā sabr mujhe

phir bhī ayyūb nahīñ mujh ko payambar na kaho

apnī taḳhlīq ko bechā nahīñ karte fankār

but-faroshoñ ko kabhī bhuul ke aazar na kaho

muntashir sadiyoñ se haiñ tār-e-garebāñ kī tarah

ham haiñ aurāq-e-pareshāñ hameñ daftar na kaho

dosto kuchh to kaho taaki maiñ ḳhud ko jānūñ

mujh ko bad-tar hī kaho gar mujhe behtar na kaho

vo to pāgal hai jise kahte haiñ sab log 'umar'

aise dīvāne ko dānā-o-qalandar na kaho

paikar-e-lala-o-gul hai use patthar na kaho

wo hai mahbub mera us ko sitamgar na kaho

ye to sach hai ki KHuda ne hai diya sabr mujhe

phir bhi ayyub nahin mujh ko payambar na kaho

apni taKHliq ko becha nahin karte fankar

but-faroshon ko kabhi bhul ke aazar na kaho

muntashir sadiyon se hain tar-e-gareban ki tarah

hum hain auraq-e-pareshan hamein daftar na kaho

dosto kuchh to kaho taki main KHud ko jaanun

mujh ko bad-tar hi kaho gar mujhe behtar na kaho

wo to pagal hai jise kahte hain sab log 'umar'

aise diwane ko dana-o-qalandar na kaho