paiman wafa ke bandh ke jaane kidhar gaya

paimāñ vafā ke bāñdh ke jaane kidhar gayā

sahrā-e-hijr mere liye ban bhañvar gayā

merī nigāh-e-sharmagīñ jhuktī chalī ga.ī

us kā bhī shauq-e-mehr-o-vafā pur-asar gayā

ik shoḳh sī nigāh jo ruḳh pe jamī rahī

aariz pe ik hasīn sā ġhāza utar gayā

us kī kitāb-e-shauq kā saada varaq thī maiñ

merā bhī ishq dekh ke us ko sañvar gayā

manzil kī chāhatoñ meñ qadam raqs meñ rahe

be-kār umr-e-rā.egāñ kā ye safar gayā

chhāyā thā mehrbān sā bādal jo dhuup meñ

mauj-e-sabā jidhar ga.ī vo bhī udhar gayā

kuchh shaam se lipaT ke 'shafaq' yuuñ judā huī

lagtā thā ab ke haath se dil kā nagar gayā

paiman wafa ke bandh ke jaane kidhar gaya

sahra-e-hijr mere liye ban bhanwar gaya

meri nigah-e-sharmagin jhukti chali gai

us ka bhi shauq-e-mehr-o-wafa pur-asar gaya

ek shoKH si nigah jo ruKH pe jami rahi

aariz pe ek hasin sa ghaza utar gaya

us ki kitab-e-shauq ka sada waraq thi main

mera bhi ishq dekh ke us ko sanwar gaya

manzil ki chahaton mein qadam raqs mein rahe

be-kar umr-e-raegan ka ye safar gaya

chhaya tha mehrban sa baadal jo dhup mein

mauj-e-saba jidhar gai wo bhi udhar gaya

kuchh sham se lipaT ke 'shafaq' yun juda hui

lagta tha ab ke hath se dil ka nagar gaya