pal-do-pal ko ubhra hi tha Dub gaya

pal-do-pal ko ubhrā hī thā Duub gayā

shor-sharābe meñ sannāTā Duub gayā

chanchal armānoñ kā dariyā Duub gayā

reg-zār meñ dil ke kyā kyā Duub gayā

ishq dostī azm-e-vafā aur sachchā.ī

majbūrī meñ har ik jazba Duub gayā

sāhil par to us ke lākhoñ sāthī the

jab Duubā vo shaḳhs akelā Duub gayā

duur ufuq ke paar tilismī vaadī meñ

vo dekho ik aur sitārā Duub gayā

ḳhush-hālī kī dhuup meñ sañg sañg rahā mere

zulmat meñ vo merā saaya Duub gayā

āñkheñ thiiñ yā vo madirā kā sāgar thiiñ

kyā kartā pardesī pyāsā Duub gayā

kār-e-ḳhair meñ dhan ko luTāyā 'sīmā' ne

kis ne kahā us kā sarmāya Duub gayā

pal-do-pal ko ubhra hi tha Dub gaya

shor-sharabe mein sannaTa Dub gaya

chanchal armanon ka dariya Dub gaya

reg-zar mein dil ke kya kya Dub gaya

ishq dosti azm-e-wafa aur sachchai

majburi mein har ek jazba Dub gaya

sahil par to us ke lakhon sathi the

jab Duba wo shaKHs akela Dub gaya

dur ufuq ke par tilismi wadi mein

wo dekho ek aur sitara Dub gaya

KHush-haali ki dhup mein sang sang raha mere

zulmat mein wo mera saya Dub gaya

aankhen thin ya wo madira ka sagar thin

kya karta pardesi pyasa Dub gaya

kar-e-KHair mein dhan ko luTaya 'sima' ne

kis ne kaha us ka sarmaya Dub gaya