palken hain qafiye teri aankhen radif hain

palkeñ haiñ qāfiye tirī āñkheñ radīf haiñ

hoñToñ kī nazmeñ bahr meñ bāham halīf haiñ

chalne meñ ik ravānī hai uThnā salīs hai

misre badan kī shāḳh pe vahshī harīf haiñ

mufrad hai terī zaat murakkab ke husn se

dil kī ġhazal meñ Duub ke fiqre latīf haiñ

sharm-o-hayā kī masnavī bandish kā vird hai

kāfir adā.eñ she'r meñ jakḌī nazīf haiñ

matla' sā jism band hai tarkīb-e-'ishq se

hoñToñ ke ḳhaal konoñ pe raushan kasīf haiñ

rangat tirī qasīde kī tashbīb se juḌī

qātil nuqūsh mad.h meñ Dhalte 'afīf haiñ

'ilm-e-'arūz ne tujhe aisā kiyā ki ab

mauzūñ ḳhayāl nasr ke lagte ḳhafīf haiñ

palken hain qafiye teri aankhen radif hain

honTon ki nazmen bahr mein baham halif hain

chalne mein ek rawani hai uThna salis hai

misre badan ki shaKH pe wahshi harif hain

mufrad hai teri zat murakkab ke husn se

dil ki ghazal mein Dub ke fiqre latif hain

sharm-o-haya ki masnawi bandish ka wird hai

kafir adaen she'r mein jakDi nazif hain

matla' sa jism band hai tarkib-e-'ishq se

honTon ke KHal konon pe raushan kasif hain

rangat teri qaside ki tashbib se juDi

qatil nuqush madh mein Dhalte 'afif hain

'ilm-e-'aruz ne tujhe aisa kiya ki ab

mauzun KHayal nasr ke lagte KHafif hain