palkon par moti rakkhe hain sochon par sannaTa hai

palkoñ par motī rakkhe haiñ sochoñ par sannāTā hai

ta.abīroñ kā shor bahut hai ḳhvāboñ par sannāTā hai

ā.ankhoñ se bāteñ karne kā mausam hai ḳhāmosh raho

aur to sab kuchh jaa.ez hai yaañ lafzoñ par sannāTā hai

din to ḳhair guzāre ham ne hañs kar bhī chup rah kar bhī

lekin jab se bichhḌe haiñ tum se rātoñ par sannāTā hai

shāyad ab mausam ke panchhī aa.eñ to chahkār uḌe

chiḌiyoñ ke ghar jab se ujḌe peḌoñ par sannāTā hai

kaun se din haiñ bachchoñ ke bin raste suune suune haiñ

koī zulf nahīñ lahrātī galiyoñ par sannāTā hai

kis se kah kar halke ho leñ koī ab miltā hī nahīñ

dil meñ huuk bahut uThtī hai hoñToñ par sannāTā hai

palkon par moti rakkhe hain sochon par sannaTa hai

tabiron ka shor bahut hai KHwabon par sannaTa hai

aaankhon se baaten karne ka mausam hai KHamosh raho

aur to sab kuchh jaez hai yan lafzon par sannaTa hai

din to KHair guzare hum ne hans kar bhi chup rah kar bhi

lekin jab se bichhDe hain tum se raaton par sannaTa hai

shayad ab mausam ke panchhi aaen to chahkar uDe

chiDiyon ke ghar jab se ujDe peDon par sannaTa hai

kaun se din hain bachchon ke bin raste sune sune hain

koi zulf nahin lahraati galiyon par sannaTa hai

kis se kah kar halke ho len koi ab milta hi nahin

dil mein huk bahut uThti hai honTon par sannaTa hai