palkon pe bhala kab ye Thaharne ke liye the

palkoñ pe bhalā kab ye Thaharne ke liye the

motī mirī āñkhoñ ke bikharne ke liye the

chamke na kisī taur bhī zinda rahe jab tak

ham ḳhaak meñ mil kar hī nikharne ke liye the

achchhā hai ki ab saaf hī kah dījiye sāhab

va.ade jo kiye the vo mukarne ke liye the

ham aaj tirī raah meñ kaam aa ga.e āḳhir

zinda hī tire naam pe marne ke liye the

achchhā nahīñ lagtā thā tire hijr meñ jiinā

ham lauT ga.e the to bikharne ke liye the

ham log sazā-vār na the vādī-e-gul ke

kāñToñ-bharī rāhoñ se guzarne ke liye the

ahbāb bhī dushman nazar aate haiñ 'nazīr' aaj

chehroñ pe lage chehre utarne ke liye the

palkon pe bhala kab ye Thaharne ke liye the

moti meri aankhon ke bikharne ke liye the

chamke na kisi taur bhi zinda rahe jab tak

hum KHak mein mil kar hi nikharne ke liye the

achchha hai ki ab saf hi kah dijiye sahab

wade jo kiye the wo mukarne ke liye the

hum aaj teri rah mein kaam aa gae aaKHir

zinda hi tere nam pe marne ke liye the

achchha nahin lagta tha tere hijr mein jina

hum lauT gae the to bikharne ke liye the

hum log saza-war na the wadi-e-gul ke

kanTon-bhari rahon se guzarne ke liye the

ahbab bhi dushman nazar aate hain 'nazir' aaj

chehron pe lage chehre utarne ke liye the