palkon se apne bhule hue KHwab bandh len

palkoñ se apne bhūle hue ḳhvāb bāñdh leñ

jab Thaan lī safar kī to asbāb bāñdh leñ

sāhil pe koī ġhol na us par jhapaT paḌe

DhūñDā hai jo ḳhazīna tah-e-āb bāñdh leñ

is āḳhirī nazāre ko gar apnā bas chale

har shai kī dauḌ se dil-e-be-tāb bāñdh leñ

jiinā to hai zarūr magar apne ird-gird

kyuuñ ik hisār-e-gumbad-o-mehrāb bāñdh leñ

yuuñ ho ki aarzū na ubhar paa.e phir kabhī

dil ke lahū se rishta-e-girdāb bāñdh leñ

shāne se ab sarakne lagī hai salīb-e-ġham

ruk kar zarā bikharte hue ḳhvāb bāñdh leñ

minhā kuchh aise apnī hī tahrīr se hue

jo bach rahā hai ab vahī asbāb bāñdh leñ

'shāhīn' us kī nazr kareñge ḳhirāj-e-dil

shīrāza-e-junūñ meñ nayā baab bāñdh leñ

palkon se apne bhule hue KHwab bandh len

jab Than li safar ki to asbab bandh len

sahil pe koi ghol na us par jhapaT paDe

DhunDa hai jo KHazina tah-e-ab bandh len

is aaKHiri nazare ko gar apna bas chale

har shai ki dauD se dil-e-be-tab bandh len

jina to hai zarur magar apne ird-gird

kyun ek hisar-e-gumbad-o-mehrab bandh len

yun ho ki aarzu na ubhar pae phir kabhi

dil ke lahu se rishta-e-girdab bandh len

shane se ab sarakne lagi hai salib-e-gham

ruk kar zara bikharte hue KHwab bandh len

minha kuchh aise apni hi tahrir se hue

jo bach raha hai ab wahi asbab bandh len

'shahin' us ki nazr karenge KHiraj-e-dil

shiraaza-e-junun mein naya bab bandh len