palTenge ruKH apna kab ye mah ye sal aaKHir

palTeñge ruḳh apnā kab ye maah ye saal āḳhir

kab tak hameñ rahnā hai yuuñ ġham se niDhāl āḳhir

kyā had se guzarnā ye ai mast-e-kamāl āḳhir

har chiiz ko duniyā meñ lāzim hai zavāl āḳhir

vo satvat-e-qaisar ho yā hashmat-e-iskandar

mil jaatā hai miTTī meñ sab jāh-o-jalāl āḳhir

maiñ tujh ko batātā huuñ kyā ishq meñ hotā hai

armān-o-talab avval andoh-o-malāl āḳhir

ye ishq jise tū ne ik mashġhala samjhā hai

kar degā tirā jiinā ḳhud tujh pa muhāl āḳhir

mahrūmī-o-nākāmī dil-sozī o jāñ-kāhī

hotā hai mohabbat kā aksar ye ma.aal āḳhir

mujh soḳhta-sāmāñ ke pahlū-e-mohabbat meñ

aaya hai ġhazal ban kar vo zohra-jamāl āḳhir

qismat ko jagāne meñ ġhaflat ko haTāne meñ

ban jā.eñge ik din ham aap apnī misāl āḳhir

zeb-e-varaq-e-dil hai ye qaul 'bahār' apnā

takmīl-e-riyāz avval tahsīl-e-kamāl āḳhir

palTenge ruKH apna kab ye mah ye sal aaKHir

kab tak hamein rahna hai yun gham se niDhaal aaKHir

kya had se guzarna ye ai mast-e-kamal aaKHir

har chiz ko duniya mein lazim hai zawal aaKHir

wo satwat-e-qaisar ho ya hashmat-e-iskandar

mil jata hai miTTi mein sab jah-o-jalal aaKHir

main tujh ko batata hun kya ishq mein hota hai

arman-o-talab awwal andoh-o-malal aaKHir

ye ishq jise tu ne ek mashghala samjha hai

kar dega tera jina KHud tujh pa muhaal aaKHir

mahrumi-o-nakaami dil-sozi o jaan-kahi

hota hai mohabbat ka aksar ye maal aaKHir

mujh soKHta-saman ke pahlu-e-mohabbat mein

aaya hai ghazal ban kar wo zohra-jamal aaKHir

qismat ko jagane mein ghaflat ko haTane mein

ban jaenge ek din hum aap apni misal aaKHir

zeb-e-waraq-e-dil hai ye qaul 'bahaar' apna

takmil-e-riyaz awwal tahsil-e-kamal aaKHir