pankh aTka mila hai baalon mein

pankh aTkā milā hai bāloñ meñ

krishn aa.e the kal ḳhayāloñ meñ

lākhoñ armān jism kī bandish

ruuh uljhī hai kitne jāloñ meñ

kyoñ sadā āsmān tak pahuñche

ab asar hī kahāñ hai nāloñ meñ

sochtā huuñ ki ab jalā hī duuñ

ḳhat jo sañbhle paḌe haiñ aaloñ meñ

tīrgī ham ko raas aatī hai

ḳhauf khāte haiñ ham ujāloñ meñ

baa'd barsoñ ke ḳhush hue haiñ ham

aap aa.e haiñ kitne sāloñ meñ

manzilo mujh se duur ho jaao

lutf aane lagā hai chhāloñ meñ

'sant' ke sher sīdhe-sāde haiñ

chhāpe jā.eñge kyā risāloñ meñ

pankh aTka mila hai baalon mein

krishn aae the kal KHayalon mein

lakhon arman jism ki bandish

ruh uljhi hai kitne jalon mein

kyon sada aasman tak pahunche

ab asar hi kahan hai nalon mein

sochta hun ki ab jala hi dun

KHat jo sanbhle paDe hain aalon mein

tirgi hum ko ras aati hai

KHauf khate hain hum ujalon mein

ba'd barson ke KHush hue hain hum

aap aae hain kitne salon mein

manzilo mujh se dur ho jao

lutf aane laga hai chhaalon mein

'sant' ke sher sidhe-sade hain

chhape jaenge kya risalon mein