pankh phailate hi banti hain chaman mein surKHiyan

pankh phailāte hī bantī haiñ chaman meñ surḳhiyāñ

is liye uḌtī nahīñ haiñ baaġh meñ ab titliyāñ

sirf ik tālāb kā paanī badalne ke liye

be-sabab is mulk meñ maarī ga.ī haiñ machhliyāñ

chāñd par jaane lagī haiñ toḌ kar bandhan sabhī

baḌh rahī haiñ har dishā meñ ho ke nirbhay laḌkiyāñ

bhuuk kā 'ālam kaheñ kyā dekhte hī dekhte

jism ġhā.eb ho chukā hai dikh rahī haiñ pasliyāñ

lūTte haiñ rahnumā ban kar luTere āj-kal

kab talak barbādī kī apnī baToreñ surḳhiyāñ

chheḌnā achchhā nahīñ hotā dabī har chiiz ko

aag bantī hai havā paatī haiñ jab chingāriyāñ

gaañv kī pahchān dhūmil ho rahī hai kyā kareñ

lupt hotī jā rahī haiñ din-ba-din ab bastiyāñ

sirf bhay ātank se hone lagā hai sāmnā

ḳhvāb ban kar rah ga.ī haiñ bachpane kī mastiyāñ

'umr-bhar laḌte rahe lahroñ se mājhī ke liye

Duub jaayā kartī haiñ nazdīk taT ke kashtiyāñ

ho gayā mushkil saḌak pe ghūmnā is daur meñ

rāt-bhar sunsān path par nāchtī haiñ putliyāñ

pankh phailate hi banti hain chaman mein surKHiyan

is liye uDti nahin hain bagh mein ab titliyan

sirf ek talab ka pani badalne ke liye

be-sabab is mulk mein mari gai hain machhliyan

chand par jaane lagi hain toD kar bandhan sabhi

baDh rahi hain har disha mein ho ke nirbhay laDkiyan

bhuk ka 'alam kahen kya dekhte hi dekhte

jism ghaeb ho chuka hai dikh rahi hain pasliyan

luTte hain rahnuma ban kar luTere aaj-kal

kab talak barbaadi ki apni baToren surKHiyan

chheDna achchha nahin hota dabi har chiz ko

aag banti hai hawa pati hain jab chingariyan

ganw ki pahchan dhumil ho rahi hai kya karen

lupt hoti ja rahi hain din-ba-din ab bastiyan

sirf bhay aatank se hone laga hai samna

KHwab ban kar rah gai hain bachpane ki mastiyan

'umr-bhar laDte rahe lahron se majhi ke liye

Dub jaya karti hain nazdik taT ke kashtiyan

ho gaya mushkil saDak pe ghumna is daur mein

raat-bhar sunsan path par nachti hain putliyan