parda-e-ghaib mein tashhir chhupi hoti hai

parda-e-ġhaib meñ tash.hīr chhupī hotī hai

ḳhvāb kī aañkh meñ ta.abīr chhupī hotī hai

us ko le aatā hai qirtās-o-qalam par ma.anī

jab kisī lafz meñ tāsīr chhupī hotī hai

maktab-e-dil se hunar siikh use paḌhne kā

saade kāġhaz meñ jo tahrīr chhupī hotī hai

vaqt kartā hai numāyāñ baḌī mashshāqī se

vasl meñ hijr kī tasvīr chhupī hotī hai

lauT ke ghar kī taraf yūñhī nahīñ aa jaatā

pā-e-āzād meñ zanjīr chhupī hotī hai

zindagī ek ḳharābī hai tirī galiyoñ meñ

har na.e moḌ pe taqdīr chhupī hotī hai

qasr meñ dauḌtī phirtī hai koī bechainī

aur kueñ meñ koī tāḳhīr chhupī hotī hai

is liye dekhtā rahtā huuñ sarāpā har dam

tere har matn meñ tafsīr chhupī hotī hai

had kī sarhad se nikal aa.uuñ to har raste meñ

pul-sirātī koī ta.azīr chhupī hotī hai

parda-e-ghaib mein tashhir chhupi hoti hai

KHwab ki aankh mein tabir chhupi hoti hai

us ko le aata hai qirtas-o-qalam par mani

jab kisi lafz mein tasir chhupi hoti hai

maktab-e-dil se hunar sikh use paDhne ka

sade kaghaz mein jo tahrir chhupi hoti hai

waqt karta hai numayan baDi mashshaqi se

wasl mein hijr ki taswir chhupi hoti hai

lauT ke ghar ki taraf yunhi nahin aa jata

pa-e-azad mein zanjir chhupi hoti hai

zindagi ek KHarabi hai teri galiyon mein

har nae moD pe taqdir chhupi hoti hai

qasr mein dauDti phirti hai koi bechaini

aur kuen mein koi taKHir chhupi hoti hai

is liye dekhta rahta hun sarapa har dam

tere har matn mein tafsir chhupi hoti hai

had ki sarhad se nikal aaun to har raste mein

pul-siraati koi tazir chhupi hoti hai