parde meri nigah ke bhi darmiyan na the

parde mirī nigāh ke bhī darmiyāñ na the

kyā kahiye un ke jalve kahāñ the kahāñ na the

jis rāste se le ga.ī thī mujh ko be-ḳhudī

us raah meñ kisī ke qadam ke nishāñ na the

rāz-āshnā hai merī nazar yā phir aa.ina

varna vo apne husn ke ḳhud rāz-dāñ na the

kuchh be-sadā se lafz nazar kah ga.ī zarūr

maanā lab-e-ḳhamosh rahīn-e-bayāñ na the

aa.e to yuuñ ki jaise hamesha the mehrbāñ

bhūle to yuuñ ki jaise kabhī mehrbāñ na the

'ashraf' fareb-e-zīst hai kab imtihāñ se kam

is ke sivā to aur yahāñ imtihāñ na the

parde meri nigah ke bhi darmiyan na the

kya kahiye un ke jalwe kahan the kahan na the

jis raste se le gai thi mujh ko be-KHudi

us rah mein kisi ke qadam ke nishan na the

raaz-ashna hai meri nazar ya phir aaina

warna wo apne husn ke KHud raaz-dan na the

kuchh be-sada se lafz nazar kah gai zarur

mana lab-e-KHamosh rahin-e-bayan na the

aae to yun ki jaise hamesha the mehrban

bhule to yun ki jaise kabhi mehrban na the

'ashraf' fareb-e-zist hai kab imtihan se kam

is ke siwa to aur yahan imtihan na the