pareshan hai sitamgar hausla gum ho gaya hai

pareshāñ hai sitamgar hausla gum ho gayā hai

guloñ meñ ḳhanjar-e-dast-e-jafā gum ho gayā hai

nihāñ hai ek nuqte meñ nizām-e-zindagānī

vajūd-e-harf to hai tarjuma gum ho gayā hai

chale aao hamārī ḳhushbuoñ ke rāste par

agar shahr-e-mohabbat kā pata gum ho gayā hai

zamānat meñ kisī kī de diyā hai mutma.in haiñ

jahāz-e-ārzū uḌtā huā gum ho gayā hai

añdherā ho gayā thā sahn-e-sajda meñ hamāre

jabīñ se nayyar-e-ḳhāk-e-shifā gum ho gayā hai

qasīde husn-e-yūsuf ke jo ab tak paḌh rahā thā

jamāl-e-ashk meñ vo aa.ina gum ho gayā hai

nigāh-e-chashm-e-irfān-o-shu.ūr-e-āgahī de

yahāñ ham aql vāloñ kā ḳhudā gum ho gayā hai

tumhārī sarhad-e-imkān chhūne ko gayā thā

hamārā tā.ir-e-fikr-e-rasā gum ho gayā hai

pareshan hai sitamgar hausla gum ho gaya hai

gulon mein KHanjar-e-dast-e-jafa gum ho gaya hai

nihan hai ek nuqte mein nizam-e-zindagani

wajud-e-harf to hai tarjuma gum ho gaya hai

chale aao hamari KHushbuon ke raste par

agar shahr-e-mohabbat ka pata gum ho gaya hai

zamanat mein kisi ki de diya hai mutmain hain

jahaz-e-arzu uDta hua gum ho gaya hai

andhera ho gaya tha sahn-e-sajda mein hamare

jabin se nayyar-e-KHak-e-shifa gum ho gaya hai

qaside husn-e-yusuf ke jo ab tak paDh raha tha

jamal-e-ashk mein wo aaina gum ho gaya hai

nigah-e-chashm-e-irfan-o-shuur-e-agahi de

yahan hum aql walon ka KHuda gum ho gaya hai

tumhaari sarhad-e-imkan chhune ko gaya tha

hamara tair-e-fikr-e-rasa gum ho gaya hai