pareshan hain adim-ul-fursati se

pareshāñ haiñ adīm-ul-fursatī se

nahīñ bezār phir bhī zindagī se

sharāfat kī koī had hai muqarrar

to baaz aa jaa.eñ sulh-o-āshtī se

chhupā.e phirte haiñ dozaḳh diloñ meñ

ba-zāhir lagte haiñ sab jannatī se

ajab hai iḳhtilāt-e-dīn-o-duniyā

na dab jaa.e kahīñ nekī badī se

tamāshe ko na kyoñ dastūr kahiye

samundar peT bhartā hai nadī se

qutub-mīnār se āvāz deñ kyā

ki ham kyā chāhte haiñ shā.erī se

añdherī raat phir ummīd se hai

kiran phūTegī us kī kokh hī se

mirī daryāft mustaqbil meñ hogī

maiñ aajiz huuñ tilism-e-āgahī se

abhī hai saḳht mehnat kī zarūrat

abhī insān kam haiñ aadmī se

ḳhalā-bāzī se mujh ko rokte haiñ

ka.ī fitne zamīnī vāqa.ī se

vahī mad.h-o-satā.ish dil-navāzī

kabhī to pesh aao be-ruḳhī se

safar āsān hai dushvār kar do

ḳhudārā saath aa jaao ḳhushī se

sunahrī dhuup se mar.ūb ho tum

buland iqbāl hotā hai ḳhudī se

mujhe aabid pukāreñ 'sarfarāz' ab

ki sach likhtā huuñ maiñ sanjīdgī se

pareshan hain adim-ul-fursati se

nahin bezar phir bhi zindagi se

sharafat ki koi had hai muqarrar

to baz aa jaen sulh-o-ashti se

chhupae phirte hain dozaKH dilon mein

ba-zahir lagte hain sab jannati se

ajab hai iKHtilat-e-din-o-duniya

na dab jae kahin neki badi se

tamashe ko na kyon dastur kahiye

samundar peT bharta hai nadi se

qutub-minar se aawaz den kya

ki hum kya chahte hain shaeri se

andheri raat phir ummid se hai

kiran phuTegi us ki kokh hi se

meri daryaft mustaqbil mein hogi

main aajiz hun tilism-e-agahi se

abhi hai saKHt mehnat ki zarurat

abhi insan kam hain aadmi se

KHala-bazi se mujh ko rokte hain

kai fitne zamini waqai se

wahi madh-o-sataish dil-nawazi

kabhi to pesh aao be-ruKHi se

safar aasan hai dushwar kar do

KHudara sath aa jao KHushi se

sunahri dhup se marub ho tum

buland iqbaal hota hai KHudi se

mujhe aabid pukaren 'sarfaraaz' ab

ki sach likhta hun main sanjidgi se