pareshan kyon na ho jaun kisi pagal ki surat

pareshāñ kyoñ na ho jā.ūñ kisī pāgal kī sūrat

nazar aatī hai mujh ko aane vaale kal kī sūrat

sunā thā ishq kā rasta baḌā kāñToñ bharā hai

maiñ sach kahtā huuñ mujh ko to lagā maḳhmal kī sūrat

rag-o-pai meñ na jaane kaun aa kar bas gayā hai

mahaktī haiñ mirī tanhā.iyāñ sandal kī sūrat

mohabbat kā hukūmat kā ki daulat kā nasha ho

banā detā hai ye insān ko pāgal kī sūrat

ta.affun kā to saarā shahr aadī ho chukā hai

mahak kar kyā kareñge ham bahut sandal kī sūrat

mire josh-e-numū se tum abhī vāqif nahīñ ho

panap saktā huuñ dīvāroñ se maiñ pīpal kī sūrat

maiñ apne zauq ko bedār rakkhūñ kaise 'ambar'

bahut din ho ga.e dekhe bharī botal kī sūrat

pareshan kyon na ho jaun kisi pagal ki surat

nazar aati hai mujh ko aane wale kal ki surat

suna tha ishq ka rasta baDa kanTon bhara hai

main sach kahta hun mujh ko to laga maKHmal ki surat

rag-o-pai mein na jaane kaun aa kar bas gaya hai

mahakti hain meri tanhaiyan sandal ki surat

mohabbat ka hukumat ka ki daulat ka nasha ho

bana deta hai ye insan ko pagal ki surat

taffun ka to sara shahr aadi ho chuka hai

mahak kar kya karenge hum bahut sandal ki surat

mere josh-e-numu se tum abhi waqif nahin ho

panap sakta hun diwaron se main pipal ki surat

main apne zauq ko bedar rakkhun kaise 'ambar'

bahut din ho gae dekhe bhari botal ki surat