pareshan mujhko aksar meri jaan malum hoti hai

pareshāñ mujh ko aksar merī jaañ mā'lūm hotī hai

har ik rūdād apnī dāstāñ mā'lūm hotī hai

baraste aag ke sho'loñ ko koī kyoñ nahīñ maane

ye dhartī kyoñ mujhe be-āsmāñ mā'lūm hotī hai

ḳhudā us anjuman meñ jis taraf uThtī haiñ ye āñkheñ

tirī tasvīr har shai meñ nihāñ mā'lūm hotī hai

mo'amma kyoñ hai har ik gaam par uljhe savāloñ kā

mujhe ye zindagī kyoñ imtihāñ mā'lūm hotī hai

nazar terī mirā ab sāmnā karne se bachtī hai

abhī shāyad ye mujh se bad-gumāñ mā'lūm hotī hai

yahāñ kamzor ke haq meñ sadā koī nahīñ uThtī

ye bastī mujh ko shāyad be-zabāñ mā'lūm hotī hai

kisī ḳhāmosh dariyā kī hai is meñ be-kasī shāmil

nidā ye 'arsh tak mujh ko rasā mā'lūm hotī hai

pareshan mujh ko aksar meri jaan ma'lum hoti hai

har ek rudad apni dastan ma'lum hoti hai

baraste aag ke sho'lon ko koi kyon nahin mane

ye dharti kyon mujhe be-asman ma'lum hoti hai

KHuda us anjuman mein jis taraf uThti hain ye aankhen

teri taswir har shai mein nihan ma'lum hoti hai

mo'amma kyon hai har ek gam par uljhe sawalon ka

mujhe ye zindagi kyon imtihan ma'lum hoti hai

nazar teri mera ab samna karne se bachti hai

abhi shayad ye mujh se bad-guman ma'lum hoti hai

yahan kamzor ke haq mein sada koi nahin uThti

ye basti mujh ko shayad be-zaban ma'lum hoti hai

kisi KHamosh dariya ki hai is mein be-kasi shamil

nida ye 'arsh tak mujh ko rasa ma'lum hoti hai