pareshani mein izhaar-e-pareshani se kya hasil

pareshānī meñ iz.hār-e-pareshānī se kyā hāsil

bhare bāzār meñ ḳhud apnī arzānī se kyā hāsil

mujhe har manzil-e-mastī se hañs hañs kar guzarnā hai

miTā de jo mirī himmat us āsānī se kyā hāsil

baġhair-e-jabr-o-quvvat jhuk nahīñ saktā jo ik sar bhī

to phir aisī jahāñgīrī jahāñbānī se kyā hāsil

hujūm-e-barq-o-bārāñ ho nuzūl-e-qahr-o-tūfāñ ho

fazā-e-āfiyat meñ bāl-jumbānī se kyā hāsil

dil-e-barbād se paidā nayā dil ho nahīñ saktā

ab aañsū poñchhiye bhī ab pashemānī se kyā hāsil

taraste haiñ dar-o-dīvār bhī ab un ke jalvoñ ko

mujhe ai ḳhāna-e-dil terī vīrānī se kyā hāsil

qafas ho yā nasheman koī ham-āhang ho varna

'adīb' aisī fuġhāñ aisī ġhazal-ḳhvānī se kyā hāsil

pareshani mein izhaar-e-pareshani se kya hasil

bhare bazar mein KHud apni arzani se kya hasil

mujhe har manzil-e-masti se hans hans kar guzarna hai

miTa de jo meri himmat us aasani se kya hasil

baghair-e-jabr-o-quwwat jhuk nahin sakta jo ek sar bhi

to phir aisi jahangiri jahanbani se kya hasil

hujum-e-barq-o-baran ho nuzul-e-qahr-o-tufan ho

faza-e-afiyat mein baal-jumbani se kya hasil

dil-e-barbaad se paida naya dil ho nahin sakta

ab aansu ponchhiye bhi ab pashemani se kya hasil

taraste hain dar-o-diwar bhi ab un ke jalwon ko

mujhe ai KHana-e-dil teri virani se kya hasil

qafas ho ya nasheman koi ham-ahang ho warna

'adib' aisi fughan aisi ghazal-KHwani se kya hasil