pari tum ho meri jaan hur tum ho mah-laqa tum ho

parī tum ho mirī jaañ huur tum ho mah-laqā tum ho

jahāñ meñ jitne haiñ māshūq un sab se judā tum ho

sarāpā naaz ho lākhoñ meñ yaktā dilrubā tum ho

maiñ hairāñ huuñ samajh meñ kuchh nahīñ aatā ki kyā tum ho

ḳhudā ne apne hāthoñ se tumheñ aisā banāyā hai

ḳhudā kī shaan bhī kahtī hai haañ shān-e-ḳhudā tum ho

na bolo kārvān-e-zindagī ab luTne vaalā hai

chalo is tarah se goyā darā-e-be-sadā tum ho

tumhārā martaba allāhu-akbar kyā Thikānā hai

tumheñ jitnā maiñ samjhā huuñ kahīñ us se sivā tum ho

tumhārī be-ruḳhī kā bhī muamma hal nahīñ hotā

ki ālam-āshnā ho aur phir nā-āshnā tum ho

mubārak mun.imoñ ko daulat-e-duniyā ho aalam meñ

hamārī aarzū tum ho hamārā mudda.ā tum ho

har ik ġhamza tumhārā āshiqoñ ko zab.h kartā hai

ki ḳhush-andāz ho ḳhush-nāz ho aur ḳhush-adā tum ho

hamīñ donoñ se hai marbūt ishq-o-husn kā aalam

ki is kī ibtidā maiñ huuñ aur is kī intihā tum ho

tumhīñ se kashtī-e-jān-e-hazīñ aa.egī sāhil tak

muhīt-e-ishq meñ ai hazrat-e-dil nāḳhudā tum ho

mai-o-māshūq se kyā baat kuchh matlab nahīñ rakhte

batāo to kahāñ ke 'sabr' aise pārsā tum ho

pari tum ho meri jaan hur tum ho mah-laqa tum ho

jahan mein jitne hain mashuq un sab se juda tum ho

sarapa naz ho lakhon mein yakta dilruba tum ho

main hairan hun samajh mein kuchh nahin aata ki kya tum ho

KHuda ne apne hathon se tumhein aisa banaya hai

KHuda ki shan bhi kahti hai han shan-e-KHuda tum ho

na bolo karwan-e-zindagi ab luTne wala hai

chalo is tarah se goya dara-e-be-sada tum ho

tumhaara martaba allahu-akbar kya Thikana hai

tumhein jitna main samjha hun kahin us se siwa tum ho

tumhaari be-ruKHi ka bhi muamma hal nahin hota

ki aalam-ashna ho aur phir na-ashna tum ho

mubarak munimon ko daulat-e-duniya ho aalam mein

hamari aarzu tum ho hamara muddaa tum ho

har ek ghamza tumhaara aashiqon ko zabh karta hai

ki KHush-andaz ho KHush-naz ho aur KHush-ada tum ho

hamin donon se hai marbut ishq-o-husn ka aalam

ki is ki ibtida main hun aur is ki intiha tum ho

tumhin se kashti-e-jaan-e-hazin aaegi sahil tak

muhit-e-ishq mein ai hazrat-e-dil naKHuda tum ho

mai-o-mashuq se kya baat kuchh matlab nahin rakhte

batao to kahan ke 'sabr' aise parsa tum ho