parinda chahta hai chand ka ab ham-safar hona

parinda chāhtā hai chāñd kā ab ham-safar honā

ġhazab us ke liye yā-rab huā ye bāl-o-par honā

ugāte jo nahīñ ḳhurshīd-e-mustaqbil vo kahte haiñ

shab-e-zulmat kī qismat meñ nahīñ raushan sahar honā

zamāna ab nayā aaya na.ī rāheñ na.ī manzil

har ik raahī ko apnā chāhiye ḳhud rāhbar honā

kabhī ġhurbat meñ ThanDak aag se mahsūs hotī hai

kabhī bārish ke qatroñ kā bhī dekhā hai sharar honā

gayā vo daur jab ġhaflat kī chādar taan lete the

nahīñ ḳhatre se ḳhālī ek pal ab be-ḳhabar honā

zamāna aur suntā is tajassus ko baḌhātā hai

fasāna aadmī kī zindagī kā muḳhtasar honā

nizām-e-zindagī ai 'tāj' ye behtar badaltī hai

abhī dekhā hai kis ne shā.erī kā bā-asar honā

parinda chahta hai chand ka ab ham-safar hona

ghazab us ke liye ya-rab hua ye baal-o-par hona

ugate jo nahin KHurshid-e-mustaqbil wo kahte hain

shab-e-zulmat ki qismat mein nahin raushan sahar hona

zamana ab naya aaya nai rahen nai manzil

har ek rahi ko apna chahiye KHud rahbar hona

kabhi ghurbat mein ThanDak aag se mahsus hoti hai

kabhi barish ke qatron ka bhi dekha hai sharar hona

gaya wo daur jab ghaflat ki chadar tan lete the

nahin KHatre se KHali ek pal ab be-KHabar hona

zamana aur sunta is tajassus ko baDhata hai

fasana aadmi ki zindagi ka muKHtasar hona

nizam-e-zindagi ai 'taj' ye behtar badalti hai

abhi dekha hai kis ne shaeri ka ba-asar hona