parinda ek uDa tha jo kal hawaon mein

parinda ek uḌā thā jo kal havāoñ meñ

vo kho gayā hai ḳhudā jaane kin fazāoñ meñ

jhulas ke rah ga.ī kyoñ fasl ārzūoñ kī

bharī huī hai ye kyā aag sī ghaTāoñ meñ

dukhoñ ke ḳhaar ugaa.e haiñ tum ne phūloñ meñ

mileñge zaḳhm bhī ab reshmī ridāoñ meñ

falak se un kā javāb aa.e bhī to kyā aa.e

bahut sukūn milā aa ke ham ko gaañv meñ

ġham-e-jahāñ hī kā partav nahīñ mire ash’ār

hai karb-e-rūh bhī shāmil mirī navāoñ meñ

mirā hai zikr jahāñ meñ tire havāle se

kabhī to aa ke mujhe mil vafā kī chhāñv meñ

kitāb-e-dil meñ the mahfūz jo 'zahīr' kabhī

bikhar ga.e haiñ fasāne vo ab fazāoñ meñ

parinda ek uDa tha jo kal hawaon mein

wo kho gaya hai KHuda jaane kin fazaon mein

jhulas ke rah gai kyon fasl aarzuon ki

bhari hui hai ye kya aag si ghaTaon mein

dukhon ke KHar ugae hain tum ne phulon mein

milenge zaKHm bhi ab reshmi ridaon mein

falak se un ka jawab aae bhi to kya aae

bahut sukun mila aa ke hum ko ganw mein

gham-e-jahan hi ka partaw nahin mere ash’ar

hai karb-e-ruh bhi shamil meri nawaon mein

mera hai zikr jahan mein tere hawale se

kabhi to aa ke mujhe mil wafa ki chhanw mein

kitab-e-dil mein the mahfuz jo 'zahir' kabhi

bikhar gae hain fasane wo ab fazaon mein