parinda shaKH par meri gawahi de raha hai

parinda shāḳh par merī gavāhī de rahā hai

gavāh-e-mo'atabar merī gavāhī de rahā hai

mirī sachchā.ī jītegī savād-e-karbalā meñ

madīne kā safar merī gavāhī de rahā hai

bashārat kī tarah phailā huā ehsās huuñ maiñ

so har ahl-e-ḳhabar merī gavāhī de rahā hai

suḳhan-ābād meñ merī azāneñ gūñjtī haiñ

koī ism-e-hunar merī gavāhī de rahā hai

yaqīnan maiñ añdhere ke qabīle se nahīñ huuñ

charāġh-e-rahguzar merī gavāhī de rahā hai

parinde aur havā donoñ mujhe pyāre bahut haiñ

nagar kā har shajar merī gavāhī de rahā hai

zamāne kī adālat meñ akelā to nahīñ maiñ

mirā puurā nagar merī gavāhī de rahā hai

sadā merī zavāl-e-shab kā thā elān-nāma

so āġhāz-e-sahar merī gavāhī de rahā hai

gavāhī saada jazbe saada ḳhvāhish kī gavāhī

mirā miTTī kā ghar merī gavāhī de rahā hai

vahī tārīḳh ko degā nayā andāz 'shaukat'

sar-e-neza jo sar merī gavāhī de rahā hai

parinda shaKH par meri gawahi de raha hai

gawah-e-mo'atabar meri gawahi de raha hai

meri sachchai jitegi sawad-e-karbala mein

madine ka safar meri gawahi de raha hai

bashaarat ki tarah phaila hua ehsas hun main

so har ahl-e-KHabar meri gawahi de raha hai

suKHan-abaad mein meri azanen gunjti hain

koi ism-e-hunar meri gawahi de raha hai

yaqinan main andhere ke qabile se nahin hun

charagh-e-rahguzar meri gawahi de raha hai

parinde aur hawa donon mujhe pyare bahut hain

nagar ka har shajar meri gawahi de raha hai

zamane ki adalat mein akela to nahin main

mera pura nagar meri gawahi de raha hai

sada meri zawal-e-shab ka tha elan-nama

so aaghaz-e-sahar meri gawahi de raha hai

gawahi sada jazbe sada KHwahish ki gawahi

mera miTTi ka ghar meri gawahi de raha hai

wahi tariKH ko dega naya andaz 'shaukat'

sar-e-neza jo sar meri gawahi de raha hai