parinde aur koi dam mein jalne wale the

parinde aur koī dam meñ jalne vaale the

daraḳht dil meñ bharī aag ugalne vaale the

muazzinoñ ko to is baat kā pata hī na thā

kahīñ se tiir añdhere meñ chalne vaale the

jahāz-rānoñ kī āñkhoñ meñ itnī vahshat thī

ki bādbān hī ḳhemoñ meñ Dhalne vaale the

ye mās-ḳhor ye andhī guphā meñ palte chor

sab apnī nasl ke murdoñ pe palne vaale the

maiñ jāntā huuñ charāġhoñ se ā.inoñ kā safar

maiñ jāntā huuñ jo bāñsoñ uchhalne vaale the

ki ret uḌ rahī hogī to yaad ā.eñge

tamām aa.ine jo raaz ugalne vaale the

mujhe kumhār ke sone se mas.ala nahīñ par

zurūf aaj bhī kachche nikalne vaale the

vo sard raat vo quqnus vo ik charāġh 'usmān'

sab apne apne alaav meñ jalne vaale the

parinde aur koi dam mein jalne wale the

daraKHt dil mein bhari aag ugalne wale the

muazzinon ko to is baat ka pata hi na tha

kahin se tir andhere mein chalne wale the

jahaz-ranon ki aankhon mein itni wahshat thi

ki baadban hi KHemon mein Dhalne wale the

ye mas-KHor ye andhi gupha mein palte chor

sab apni nasl ke murdon pe palne wale the

main jaanta hun charaghon se aainon ka safar

main jaanta hun jo banson uchhalne wale the

ki ret uD rahi hogi to yaad aaenge

tamam aaine jo raaz ugalne wale the

mujhe kumhaar ke sone se masala nahin par

zuruf aaj bhi kachche nikalne wale the

wo sard raat wo quqnus wo ek charagh 'usman'

sab apne apne alaw mein jalne wale the