partaw-e-ruKH ka tere dil mein guzar rahta hai

partav-e-ruḳh kā tire dil meñ guzar rahtā hai

saath ā.īne ke ā.īne kā ghar rahtā hai

āj-kal josh pe ye dīda-e-tar rahtā hai

mardum-e-shahr ko tūfān kā Dar rahtā hai

qatl-e-ushshāq unheñ madd-e-nazar rahtā hai

nīmcha āTh-pahr zeb-e-kamar rahtā hai

soz-e-ulfat kā hai parvāna dil-e-bazm apnā

ye vo pamba hai nihāñ jis meñ sharar rahtā hai

bazm-e-ulfat meñ qadam rakhte haiñ jo log apnā

sham.a kī tarah kaf-e-dast pe sar rahtā hai

chashm-e-maigūñ se hai saaqī kī mohabbat jis ko

nashsha-e-mai meñ vo chor āTh-pahr rahtā hai

qaul-o-iqrār pe kyuuñ chhoḌ diyā dahan-e-yār

is nadāmat se garebān meñ sar rahtā hai

ab to dam-bhar unheñ fursat nahīñ ārā.ish se

aa.ina āTh-pahr pesh-e-nazar rahtā hai

kushta-e-teġh-e-nigah tālib-e-dīdār raheñ

chashm-e-jānāñ ko ye manzūr-e-nazar rahtā hai

ye bhī haiñ us falak-e-husn ke juuyā mirī tarh

chāñd sūraj ko jo din-rāt safar rahtā hai

jab bigaḌte haiñ to manñe kā vo lete nahīñ naam

pahroñ apnā qadam-e-yār pe sar rahtā hai

belā bāTeñge savārī meñ kisī gul ke ye kyā

ġhunchoñ kī muTThiyoñ meñ kis liye zar rahtā hai

maiñ vo dīvāna huuñ jab fasl-e-bahār aatī hai

mere vīrāne meñ pariyoñ kā guzar rahtā hai

vasl kī shab bhī nahīñ chain se kaTne paatī

har-dam āzurdagi-e-yār kā Dar rahtā hai

dekhne vaale samajhte haiñ abas tār-e-nazar

merī āñkhoñ meñ tirā mū-e-kamar rahtā hai

ġhair ke bas meñ 'qalaq' kyuuñ na ho vo sīm-badan

qābū-e-yār meñ ganjīna-e-zar rahtā hai

partaw-e-ruKH ka tere dil mein guzar rahta hai

sath aaine ke aaine ka ghar rahta hai

aaj-kal josh pe ye dida-e-tar rahta hai

mardum-e-shahr ko tufan ka Dar rahta hai

qatl-e-ushshaq unhen madd-e-nazar rahta hai

nimcha aaTh-pahr zeb-e-kamar rahta hai

soz-e-ulfat ka hai parwana dil-e-bazm apna

ye wo pamba hai nihan jis mein sharar rahta hai

bazm-e-ulfat mein qadam rakhte hain jo log apna

shama ki tarah kaf-e-dast pe sar rahta hai

chashm-e-maigun se hai saqi ki mohabbat jis ko

nashsha-e-mai mein wo chor aaTh-pahr rahta hai

qaul-o-iqrar pe kyun chhoD diya dahan-e-yar

is nadamat se gareban mein sar rahta hai

ab to dam-bhar unhen fursat nahin aaraish se

aaina aaTh-pahr pesh-e-nazar rahta hai

kushta-e-tegh-e-nigah talib-e-didar rahen

chashm-e-jaanan ko ye manzur-e-nazar rahta hai

ye bhi hain us falak-e-husn ke juya meri tarh

chand suraj ko jo din-raat safar rahta hai

jab bigaDte hain to manne ka wo lete nahin nam

pahron apna qadam-e-yar pe sar rahta hai

bela baTenge sawari mein kisi gul ke ye kya

ghunchon ki muTThiyon mein kis liye zar rahta hai

main wo diwana hun jab fasl-e-bahaar aati hai

mere virane mein pariyon ka guzar rahta hai

wasl ki shab bhi nahin chain se kaTne pati

har-dam aazurdagi-e-yar ka Dar rahta hai

dekhne wale samajhte hain abas tar-e-nazar

meri aankhon mein tera mu-e-kamar rahta hai

ghair ke bas mein 'qalaq' kyun na ho wo sim-badan

qabu-e-yar mein ganjina-e-zar rahta hai