partaw paDa jo aariz-e-gulgun-e-yar ka

partav paḌā jo āriz-e-gulgūn-e-yār kā

uTThā tanūr-e-lāla se tūfāñ bahār kā

ham-chashm laala hai jo dil-e-dāġh-dār kā

nargis ko ham sā āriza hai intizār kā

likhtā hai vasf sho.ala-e-ruḳhsār-e-yār kā

jā-e-varaq ho haath meñ pattā chinār kā

bīmār-e-'ishq huuñ lab-o-dandān-e-yār kā

nusḳhe meñ mere chāhiye sharbat anaar kā

rishte kī tarah se dur-e-dandāñ kā tere zaar

sākin hai kūcha-e-guhar-e-āb-dār kā

āsār-e-ishq-e-ḳhāk se bhī apne haiñ 'ayāñ

be-vaj.h rang zard nahīñ hai ġhubār kā

har zarra apnī ḳhaak kā hai chashm-e-intizār

yārab idhar bhī ho guzar us shahsavār kā

ham 'āsiyoñ ko ba.ad-e-fanā bhī ye ḳhauf hai

taḳhta ulaT na jaa.e zamīn-e-mazār kā

kaliyāñ talak na niklī thiiñ jab se asiir huuñ

dekhā mazā na kuchh chaman-e-rozgār kā

chashmān-e-yār karne lagīñ haiñ diloñ ko said

in āhuoñ ko shauq huā hai shikār kā

vo dil-jale haiñ sho.ala-e-javvāla ban gayā

uTThā jo gard-e-bād hamāre ġhubār kā

yād-e-mizha ne bāġh-e-dil-e-dāġh-dār meñ

khaTkā lagā diyā ḳhalish-e-nok-e-ḳhār kā

kushta huuñ ek tark ke tīr-e-nigāh kā

andāz-e-murġh dil meñ hai zaḳhmī shikār kā

raḳht-e-safed sūrat-e-mīnā-e-mai hai surḳh

kyā rang phuuT niklā hai andām-e-yār kā

phūloñ kī jā pyāla ho labrez phuul se

tiijā hai mai-kasho 'qalaq'-e-bāda-ḳhvār kā

partaw paDa jo aariz-e-gulgun-e-yar ka

uTTha tanur-e-lala se tufan bahaar ka

ham-chashm lala hai jo dil-e-dagh-dar ka

nargis ko hum sa aariza hai intizar ka

likhta hai wasf shoala-e-ruKHsar-e-yar ka

ja-e-waraq ho hath mein patta chinar ka

bimar-e-'ishq hun lab-o-dandan-e-yar ka

nusKHe mein mere chahiye sharbat anar ka

rishte ki tarah se dur-e-dandan ka tere zar

sakin hai kucha-e-guhar-e-ab-dar ka

aasar-e-ishq-e-KHak se bhi apne hain 'ayan

be-wajh rang zard nahin hai ghubar ka

har zarra apni KHak ka hai chashm-e-intizar

yarab idhar bhi ho guzar us shahsawar ka

hum 'asiyon ko baad-e-fana bhi ye KHauf hai

taKHta ulaT na jae zamin-e-mazar ka

kaliyan talak na nikli thin jab se asir hun

dekha maza na kuchh chaman-e-rozgar ka

chashman-e-yar karne lagin hain dilon ko said

in aahuon ko shauq hua hai shikar ka

wo dil-jale hain shoala-e-jawwala ban gaya

uTTha jo gard-e-baad hamare ghubar ka

yaad-e-mizha ne bagh-e-dil-e-dagh-dar mein

khaTka laga diya KHalish-e-nok-e-KHar ka

kushta hun ek tark ke tir-e-nigah ka

andaz-e-murgh dil mein hai zaKHmi shikar ka

raKHt-e-safed surat-e-mina-e-mai hai surKH

kya rang phuT nikla hai andam-e-yar ka

phulon ki ja pyala ho labrez phul se

tija hai mai-kasho 'qalaq'-e-baada-KHwar ka