pas-e-ghubar madad mangte hain pani se

pas-e-ġhubār madad māñgte haiñ paanī se

ye log tañg haiñ miTTī kī hukmarānī se

ye haath suukh ke jhaḌne ko ho ga.e lekin

maiñ dast-kash na huā terī mehrbānī se

phir us ke ba.ad phaloñ meñ miThās aa.ī nahīñ

shajar ne kaam liyā thā ġhalat-bayānī se

kisī jazīre pe shāyad khulā ye baaġh koī

mahak gulāb kī aatī hai bahte paanī se

maiñ tere vasl kā lamha bachā sakūñ shāyad

mirā ta.alluq-e-ḳhātir hai rā.egānī se

navāh-e-shahr meñ phailī hai maut kī ḳhushbū

magar ye log ki lagte haiñ jāvedānī se

tire visāl ke mausam meñ ustuvār huā

koī ajab sā ta.alluq jahān-e-fānī se

tū mil gayā hai to achchhā huā vagarna dost

kise ġharaz thī mohabbat meñ kāmrānī se

pahuñch chuke haiñ mohabbat meñ us jagah ham log

jahāñ yaqīñ nahīñ aatā yaqīñ-dahānī se

pas-e-ghubar madad mangte hain pani se

ye log tang hain miTTi ki hukmarani se

ye hath sukh ke jhaDne ko ho gae lekin

main dast-kash na hua teri mehrbani se

phir us ke baad phalon mein miThas aai nahin

shajar ne kaam liya tha ghalat-bayani se

kisi jazire pe shayad khula ye bagh koi

mahak gulab ki aati hai bahte pani se

main tere wasl ka lamha bacha sakun shayad

mera talluq-e-KHatir hai raegani se

nawah-e-shahr mein phaili hai maut ki KHushbu

magar ye log ki lagte hain jawedani se

tere visal ke mausam mein ustuwar hua

koi ajab sa talluq jahan-e-fani se

tu mil gaya hai to achchha hua wagarna dost

kise gharaz thi mohabbat mein kaamrani se

pahunch chuke hain mohabbat mein us jagah hum log

jahan yaqin nahin aata yaqin-dahani se