pas-e-sukut suKHan ko KHabar banaya jae

pas-e-sukūt suḳhan ko ḳhabar banāyā jaa.e

fasīl-e-harf meñ ma.anī kā dar banāyā jaa.e

hisāb-e-sūd-o-ziyāñ ho chukā bahut ab ke

vufūr-e-shauq ko arz-e-hunar banāyā jaa.e

lagan uḌaan kī dil meñ hanūz baaqī hai

kaTe paroñ hī ko ab shāh-par banāyā jaa.e

kisī paḌāv pe pahuñcheñge jab to socheñge

abhī se kyā koī zād-e-safar banāyā jaa.e

farāz-e-dār pe kar ke buland āḳhir-e-shab

mire hī sar ko nishān-e-sahar banāyā jaa.e

bahut tavīl huā silsila raqābat kā

kabhī milo to use muḳhtasar banāyā jaa.e

qadam qadam pe hai bastī meñ vahshiyoñ kā hujūm

chalo kahīñ kisī sahrā meñ ghar banāyā jaa.e

zamīr-e-nau-e-bashar kab se ho chukā ruḳhsat

na.e ḳhamīr se taaza bashar banāyā jaa.e

mafar muhāl hai qaid-e-makāñ se jab 'irfāñ'

to kyuuñ na phir isī gumbad ko ghar banāyā jaa.e

pas-e-sukut suKHan ko KHabar banaya jae

fasil-e-harf mein mani ka dar banaya jae

hisab-e-sud-o-ziyan ho chuka bahut ab ke

wufur-e-shauq ko arz-e-hunar banaya jae

lagan uDan ki dil mein hanuz baqi hai

kaTe paron hi ko ab shah-par banaya jae

kisi paDaw pe pahunchenge jab to sochenge

abhi se kya koi zad-e-safar banaya jae

faraaz-e-dar pe kar ke buland aaKHir-e-shab

mere hi sar ko nishan-e-sahar banaya jae

bahut tawil hua silsila raqabat ka

kabhi milo to use muKHtasar banaya jae

qadam qadam pe hai basti mein wahshiyon ka hujum

chalo kahin kisi sahra mein ghar banaya jae

zamir-e-nau-e-bashar kab se ho chuka ruKHsat

nae KHamir se taza bashar banaya jae

mafar muhaal hai qaid-e-makan se jab 'irfan'

to kyun na phir isi gumbad ko ghar banaya jae