pata chala koi girdab se guzarte hue

patā chalā koī girdāb se guzarte hue

na band hote hue baab se guzarte hue

ki ye to rakhtā pareshān hī mujhe shab-bhar

maiñ jaag uThā huuñ tire ḳhvāb se guzarte hue

maiñ apne dil ke añdheroñ ko yaad rakhtā huuñ

tire badan kī tab-o-tāb se guzarte hue

havā-e-ḳhauf-e-ḳhizāñ meñ laraztā rahtā huuñ

kisī bhī vādi-e-shādāb se guzarte hue

mujhe jo miltī nahīñ dushmanoñ kī ḳhair-ḳhabara

to pūchh letā huuñ ahbāb se guzarte hue

zamīñ pe dekhtā huuñ aab meñ gulāb ravāñ

aur āsmān pe surḳhāb se guzarte hue

maiñ chhoḌ aayā huuñ pīchhe hazār-hā meñDak

suḳhan-sarā.ī ke tālāb se guzarte hue

mujhe to ek bahāna hī chāhiye thā faqat

ki Duub jā.ūñgā pāyāb se guzarte hue

kahāñ chalī ga.iiñ karke ye toḌ phoḌ 'zafar'

vo bijliyāñ mire āsāb se guzarte hue

pata chala koi girdab se guzarte hue

na band hote hue bab se guzarte hue

ki ye to rakhta pareshan hi mujhe shab-bhar

main jag uTha hun tere KHwab se guzarte hue

main apne dil ke andheron ko yaad rakhta hun

tere badan ki tab-o-tab se guzarte hue

hawa-e-KHauf-e-KHizan mein larazta rahta hun

kisi bhi wadi-e-shadab se guzarte hue

mujhe jo milti nahin dushmanon ki KHair-KHabara

to puchh leta hun ahbab se guzarte hue

zamin pe dekhta hun aab mein gulab rawan

aur aasman pe surKHab se guzarte hue

main chhoD aaya hun pichhe hazar-ha meinDak

suKHan-sarai ke talab se guzarte hue

mujhe to ek bahana hi chahiye tha faqat

ki Dub jaunga payab se guzarte hue

kahan chali gain karke ye toD phoD 'zafar'

wo bijliyan mere aasab se guzarte hue