patta patta kyon hai dil afgar is gulzar ka

patta patta kyoñ hai dil afgār is gulzār kā

gul se gul barham hai kyoñ kyā hai sabab takrār kā

sahme sahme se haiñ kyoñ sab ġhuncha-o-gul-barg aaj

kis ne chhīnā hai guloñ ke lab se haq iz.hār kā

zahr ko dī chhūT kis ne phailne kī har taraf

ḳhushbuoñ par kyoñ kaḌā pahrā hai pahre-dār kā

bulbuleñ hai be-surī ḳhabreñ ye kis ne haiñ gaḌhī

kis ne kavve ko diyā hai martaba fankār kā

kaun hai jis ne añdheroñ ko diyā hai iḳhtiyār

rok lo puurī tarah se rāsta anvār kā

gul khilāne kā salīqa to use aayā nahīñ

naam gul hai rakh diyā bas bāġhbāñ ne ḳhaar kā

baj rahā har bazm meñ ab raag darbārī faqat

kis kī jur.at hai ki gaa.e raag ab malhār kā

kyoñ hameñ un se tavaqqo' thī chaman-bandī kī uff

vo jinheñ bas tajraba thā ġhārat-e-gulzār kā

ho rahī hai bārish-e-ikrām bātil par mudām

aur 'atā haq ko huā hai ab laqab ġhaddār kā

dhañs rahā hai aur bhī ġhurbat meñ har ġhurbat-zada

aur musalsal baḌh rahā hai māl-o-zar zar-dār kā

khel chaltā hai siyāsat kā usī ke zar se jab

kyoñ na ho sarkār meñ phir daḳhl sāhūkār kā

kām-dhande to paḌe haiñ sab ke sab Thap āj-kal

garm hai bāzār bas nafrat ke kārobār kā

sar jhukānā mat kabhī zulm-o-sitam ke sāmne

hai 'sadā' kāñdhe pe tere sar agar sardār kā

patta patta kyon hai dil afgar is gulzar ka

gul se gul barham hai kyon kya hai sabab takrar ka

sahme sahme se hain kyon sab ghuncha-o-gul-barg aaj

kis ne chhina hai gulon ke lab se haq izhaar ka

zahr ko di chhuT kis ne phailne ki har taraf

KHushbuon par kyon kaDa pahra hai pahre-dar ka

bulbulen hai be-suri KHabren ye kis ne hain gaDhi

kis ne kawwe ko diya hai martaba fankar ka

kaun hai jis ne andheron ko diya hai iKHtiyar

rok lo puri tarah se rasta anwar ka

gul khilane ka saliqa to use aaya nahin

nam gul hai rakh diya bas baghban ne KHar ka

baj raha har bazm mein ab rag darbari faqat

kis ki jurat hai ki gae rag ab malhaar ka

kyon hamein un se tawaqqo' thi chaman-bandi ki uff

wo jinhen bas tajraba tha ghaarat-e-gulzar ka

ho rahi hai barish-e-ikram baatil par mudam

aur 'ata haq ko hua hai ab laqab ghaddar ka

dhans raha hai aur bhi ghurbat mein har ghurbat-zada

aur musalsal baDh raha hai mal-o-zar zar-dar ka

khel chalta hai siyasat ka usi ke zar se jab

kyon na ho sarkar mein phir daKHl sahukar ka

kaam-dhande to paDe hain sab ke sab Thap aaj-kal

garm hai bazar bas nafrat ke karobar ka

sar jhukana mat kabhi zulm-o-sitam ke samne

hai 'sada' kandhe pe tere sar agar sardar ka