patte ki tarah TuT ke nazron se gira hun

patte kī tarah TuuT ke nazroñ se girā huuñ

har rañg se maiñ barsar-e-paikār rahā huuñ

mujh ko varaq-e-daftar-e-farsūda na samjho

har daur ke dīvān kā maiñ naġhma-sarā huuñ

sadiyoñ se musallat thā vo ik lamha-e-jāved

tanhā.ī-e-shab meñ jo kabhī tujh se milā huuñ

ye bhī to mirā sheva-e-īsā-nafasī hai

har jalte badan ke liye maiñ ThanDī havā huuñ

har saada varaq paikar-e-fariyād banā hai

dīvān ke dīvān ko maiñ chaaT chukā huuñ

ik din to ujāloñ se gale mil ke rahūñgā

sadiyoñ se añdheroñ ke ham-āġhosh rahā huuñ

ḳhurshed ke sahbā meñ hayāt apnī Dubo kar

maiñ gardish-e-ayyām se bhī khel rahā huuñ

patte ki tarah TuT ke nazron se gira hun

har rang se main barsar-e-paikar raha hun

mujh ko waraq-e-daftar-e-farsuda na samjho

har daur ke diwan ka main naghma-sara hun

sadiyon se musallat tha wo ek lamha-e-jawed

tanhai-e-shab mein jo kabhi tujh se mila hun

ye bhi to mera shewa-e-isa-nafasi hai

har jalte badan ke liye main ThanDi hawa hun

har sada waraq paikar-e-fariyaad bana hai

diwan ke diwan ko main chaT chuka hun

ek din to ujalon se gale mil ke rahunga

sadiyon se andheron ke ham-aghosh raha hun

KHurshed ke sahba mein hayat apni Dubo kar

main gardish-e-ayyam se bhi khel raha hun