patte mere chaman se uTha le gai hawa

patte mire chaman se uThā le ga.ī havā

har yaad fasl-e-gul kī uḌā le ga.ī havā

sarsabz mausamoñ kī bashārat sunā ke aaj

be-barg Tahniyoñ kī duā le ga.ī havā

Thahrī jo us hasīñ ke sirhāne zarā sī der

mauj-e-nafas se ram kī adā le ga.ī havā

har shāḳh par gulāb khilātī chalī ga.ī

jis samt us kī bū-e-qabā le ga.ī havā

ahl-e-haram kī murda-dilī ke ilaaj ko

kū-e-butāñ se ḳhāk-e-shifā le ga.ī havā

āsūdgān-e-gulshan-e-barg-o-navā ke naam

faryād-e-murġh-e-qibla-numā le ga.ī havā

tārīk bastiyoñ meñ ye kyā DhūñDhtī hai ab

zau har charāġh se tū churā le ga.ī havā

sunte ye haiñ ki qasr-e-sulaimāñ kī ḳhaak ko

āḳhir uḌā ke sū-e-sabā le ga.ī havā

patte mere chaman se uTha le gai hawa

har yaad fasl-e-gul ki uDa le gai hawa

sarsabz mausamon ki bashaarat suna ke aaj

be-barg Tahniyon ki dua le gai hawa

Thahri jo us hasin ke sirhane zara si der

mauj-e-nafas se ram ki ada le gai hawa

har shaKH par gulab khilati chali gai

jis samt us ki bu-e-qaba le gai hawa

ahl-e-haram ki murda-dili ke ilaj ko

ku-e-butan se KHak-e-shifa le gai hawa

aasudgan-e-gulshan-e-barg-o-nawa ke nam

faryaad-e-murgh-e-qibla-numa le gai hawa

tarik bastiyon mein ye kya DhunDhti hai ab

zau har charagh se tu chura le gai hawa

sunte ye hain ki qasr-e-sulaiman ki KHak ko

aaKHir uDa ke su-e-saba le gai hawa