patthar pe bhi KHaka tera khincha nahin jata

patthar pe bhī ḳhāka tirā khīñchā nahīñ jaatā

but bhī tirī sūrat kā tarāshā nahīñ jaatā

be-lāg nazar se tujhe dekhā nahīñ jaatā

andāz-e-nazar apnā chhupāyā nahīñ jaatā

kar bhuul ke tū us se na zikr apnī vafā kā

mahbūb ko ehsān jatāyā nahīñ jaatā

baaz aate nahīñ zulm-o-sitam karne se phir bhī

kahte haiñ taḌapnā tirā dekhā nahīñ jaatā

jaañ saath liye jā.ūñgā kahtā hai ġham-e-ishq

aaya huuñ akelā maiñ akelā nahīñ jaatā

go vo hai jafā-kesh jafā-sāz jafā-gar

sūrat se magar us kī ye paayā nahīñ jaatā

majbūr-e-mohabbat ko sañbhāleñge kahāñ ham

dil apnā ḳhud apne se sañbhālā nahīñ jaatā

ġhā.eb hue vo jab se jamāl apnā dikhā kar

āñkhoñ meñ jo aaya hai añdherā nahīñ jaatā

dushvār nahīñ koh-e-alam sar pe uThānā

zillat kā magar baar uThāyā nahīñ jaatā

ai 'qadr' nazar diid se aisī huī ḳhīra

jalve kā tasavvur bhī jamāyā nahīñ jaatā

patthar pe bhi KHaka tera khincha nahin jata

but bhi teri surat ka tarasha nahin jata

be-lag nazar se tujhe dekha nahin jata

andaz-e-nazar apna chhupaya nahin jata

kar bhul ke tu us se na zikr apni wafa ka

mahbub ko ehsan jataya nahin jata

baz aate nahin zulm-o-sitam karne se phir bhi

kahte hain taDapna tera dekha nahin jata

jaan sath liye jaunga kahta hai gham-e-ishq

aaya hun akela main akela nahin jata

go wo hai jafa-kesh jafa-saz jafa-gar

surat se magar us ki ye paya nahin jata

majbur-e-mohabbat ko sanbhaalenge kahan hum

dil apna KHud apne se sanbhaala nahin jata

ghaeb hue wo jab se jamal apna dikha kar

aankhon mein jo aaya hai andhera nahin jata

dushwar nahin koh-e-alam sar pe uThana

zillat ka magar bar uThaya nahin jata

ai 'qadr' nazar did se aisi hui KHira

jalwe ka tasawwur bhi jamaya nahin jata