pattharon ke darmiyan kya kya fasane rakh diye

pattharoñ ke darmiyāñ kyā kyā fasāne rakh diye

qaid kar ke ham ne lamhoñ meñ zamāne rakh diye

bhīgī palkeñ us ke dāman se lipaT kar kah ga.iiñ

umr kī rāhoñ meñ ham ne ye ḳhazāne rakh diye

hijratoñ ke zaḳhm saare ek pal meñ bhar ga.e

apne baazū us ne jab mere sirhāne rakh diye

jāgtī āñkheñ haiñ maiñ huuñ aur ujāloñ kā safar

ḳhvāb jab se us ne palkoñ par suhāne rakh diye

zehn kī dīvār par utre haiñ maazī ke parind

ḳhvāhishoñ ke phir kisī ne chhat pe daane rakh diye

kis ke chehre par likhī hai dāstāñ kis kī 'nasīm'

ham ne sab ke sāmne ā.īna-ḳhāne rakh diye

pattharon ke darmiyan kya kya fasane rakh diye

qaid kar ke hum ne lamhon mein zamane rakh diye

bhigi palken us ke daman se lipaT kar kah gain

umr ki rahon mein hum ne ye KHazane rakh diye

hijraton ke zaKHm sare ek pal mein bhar gae

apne bazu us ne jab mere sirhane rakh diye

jagti aankhen hain main hun aur ujalon ka safar

KHwab jab se us ne palkon par suhane rakh diye

zehn ki diwar par utre hain mazi ke parind

KHwahishon ke phir kisi ne chhat pe dane rakh diye

kis ke chehre par likhi hai dastan kis ki 'nasim'

hum ne sab ke samne aaina-KHane rakh diye