pech gesu ke ta-kamar nikle

pech gesū ke tā-kamar nikle

ishq-e-be-par ke bāl-o-par nikle

husn par mar-miTe haiñ ahl-e-dil

aur ḳharīdār ahl-e-zar nikle

chāñd-tāroñ ke rāz-dāñ ab tak

dil ke aalam se be-ḳhabar nikle

raat meñ luT ke ġharq-e-hairat huuñ

rāhzan din ke rāhbar nikle

ahl-e-zar ke liye jo phuul bane

ahl-e-dil ke liye sharar nikle

tah-ba-tah chhā ga.ī hai tārīkī

kis tarah aañkh se nazar nikle

munjamid ho ga.ī hai zulmat-e-shab

mehr-sūrat koī qamar nikle

bujh rahe haiñ charāġh āḳhir-e-shab

jhuTpuTe se kahīñ sahar nikle

kaise samjhā.ūñ ahl-e-duniyā ko

koī mujh sā na be-hunar nikle

maiñ hī ġhairat kā vo janāza huuñ

jis ko lāzim hai umr-bhar nikle

pech gesu ke ta-kamar nikle

ishq-e-be-par ke baal-o-par nikle

husn par mar-miTe hain ahl-e-dil

aur KHaridar ahl-e-zar nikle

chand-taron ke raaz-dan ab tak

dil ke aalam se be-KHabar nikle

raat mein luT ke gharq-e-hairat hun

rahzan din ke rahbar nikle

ahl-e-zar ke liye jo phul bane

ahl-e-dil ke liye sharar nikle

tah-ba-tah chha gai hai tariki

kis tarah aankh se nazar nikle

munjamid ho gai hai zulmat-e-shab

mehr-surat koi qamar nikle

bujh rahe hain charagh aaKHir-e-shab

jhuTpuTe se kahin sahar nikle

kaise samjhaun ahl-e-duniya ko

koi mujh sa na be-hunar nikle

main hi ghairat ka wo janaza hun

jis ko lazim hai umr-bhar nikle