peDon se dhup pichhle-pahar ki phisal gai

peḌoñ se dhuup pichhle-pahar kī phisal ga.ī

sūraj ko ruḳhsatī kā ufuq se payām hai

phailā huā hai kamre meñ ehsās-e-be-hisī

ḳhāmoshiyoñ se be-suḳhanī ham-kalām hai

aahaT ho qufl khulne kī darvāza baaz ho

āñkhoñ ko ab yaqīñ hai ye ummīd-e-ḳhām hai

ye umr-e-sust-gām guzartī hai is tarah

har aan dil ko vaqt-shumārī se kaam hai

rahtī hai sirf us se tasavvur meñ guftugū

ārām-gāh-e-rūh meñ jis kā maqām hai

vo ham-safar jo chhoḌ ke aage chale ga.e

ai mauja-e-havā unheñ merā salām hai

har ik ko nā-guzīr huī dāvat-e-fanā

Thahrāv hai sahar ko na shab ko davām hai

haiñ an-kahe bahut se suḳhan-hā-e-guftanī

afsāna-e-hayāt sadā nā-tamām hai

din jā rahā hai jaise judā ho rahe haiñ dost

kaisī bujhī bujhī sī ye garmī kī shaam hai

peDon se dhup pichhle-pahar ki phisal gai

suraj ko ruKHsati ka ufuq se payam hai

phaila hua hai kamre mein ehsas-e-be-hisi

KHamoshiyon se be-suKHani ham-kalam hai

aahaT ho qufl khulne ki darwaza baz ho

aankhon ko ab yaqin hai ye ummid-e-KHam hai

ye umr-e-sust-gam guzarti hai is tarah

har aan dil ko waqt-shumari se kaam hai

rahti hai sirf us se tasawwur mein guftugu

aaram-gah-e-ruh mein jis ka maqam hai

wo ham-safar jo chhoD ke aage chale gae

ai mauja-e-hawa unhen mera salam hai

har ek ko na-guzir hui dawat-e-fana

Thahraw hai sahar ko na shab ko dawam hai

hain an-kahe bahut se suKHan-ha-e-guftani

afsana-e-hayat sada na-tamam hai

din ja raha hai jaise juda ho rahe hain dost

kaisi bujhi bujhi si ye garmi ki sham hai