pesh-e-nigah jab se wo mast-e-shabab hai

pesh-e-nigāh jab se vo mast-e-shabāb hai

har vaqt be-piye hī surūr-e-sharāb hai

kyā pūchhte ho 'ishq meñ kyā iztirāb hai

marnā agar muhāl to jiinā 'azāb hai

vo muntaḳhab hasīnoñ meñ ham ‘āshiqoñ meñ fard

un kī misāl hai na hamārā javāb hai

muddat ke baa'd aaj huī hai du'ā qubūl

muzhda ai shauq-e-dīd ki vo be-naqāb hai

mehmāñ-sarā-e-dahr meñ kis ko qiyām hai

jis ko bhī dekhiye vahī pā-dar-rikāb hai

sharmāte haiñ vo aa.ine meñ apnī shakl se

qurbān is hijāb ke achchhā hijāb hai

yā maiñ huuñ yā raqīb hai mahfil meñ aap kī

kis kī taraf ishāra hai kis se ḳhitāb hai

jaage haiñ bazm-e-ġhair meñ shāyad vo rāt-bhar

chehra bhī aaj sust hai āñkhoñ meñ ḳhvāb hai

fariyād merī sun ke vo bole raqīb se

shāyad ye vo hī 'hājir'-e-ḳhāna-ḳharāb hai

pesh-e-nigah jab se wo mast-e-shabab hai

har waqt be-piye hi surur-e-sharab hai

kya puchhte ho 'ishq mein kya iztirab hai

marna agar muhaal to jina 'azab hai

wo muntaKHab hasinon mein hum ‘ashiqon mein fard

un ki misal hai na hamara jawab hai

muddat ke ba'd aaj hui hai du'a qubul

muzhda ai shauq-e-did ki wo be-naqab hai

mehman-sara-e-dahr mein kis ko qiyam hai

jis ko bhi dekhiye wahi pa-dar-rikab hai

sharmate hain wo aaine mein apni shakl se

qurban is hijab ke achchha hijab hai

ya main hun ya raqib hai mahfil mein aap ki

kis ki taraf ishaara hai kis se KHitab hai

jage hain bazm-e-ghair mein shayad wo raat-bhar

chehra bhi aaj sust hai aankhon mein KHwab hai

fariyaad meri sun ke wo bole raqib se

shayad ye wo hi 'hajir'-e-KHana-KHarab hai