pesh har gam pe aafat kabhi aisi to na thi

pesh har gaam pe aafat kabhī aisī to na thī

‘arbada jo mirī qismat kabhī aisī to na thī

husn rusvā-e-zamāna kabhī aisā to na thā

'ishq ke naam pe tohmat kabhī aisī to na thī

apne saa.e se bhī aatā hai mujhe ḳhauf ab to

bad-gumānī kī ye sūrat kabhī aisī to na thī

fasl-e-gul meñ bhī hai pāmāl ḳhizāñ kī mānind

gulshan-e-zīst kī sūrat kabhī aisī to na thī

iḳhtilāfāt to the ahl-e-chaman meñ lekin

lāla-o-gul meñ 'adāvat kabhī aisī to na thī

pūjtā huuñ maiñ inheñ apne ḳhudāoñ kī tarah

in butoñ se mujhe nisbat kabhī aisī to na thī

us ke har 'aks se aatā hai mujhe ḳhauf 'jalīs'

aa.ine se mujhe vahshat kabhī aisī to na thī

pesh har gam pe aafat kabhi aisi to na thi

‘arbada jo meri qismat kabhi aisi to na thi

husn ruswa-e-zamana kabhi aisa to na tha

'ishq ke nam pe tohmat kabhi aisi to na thi

apne sae se bhi aata hai mujhe KHauf ab to

bad-gumani ki ye surat kabhi aisi to na thi

fasl-e-gul mein bhi hai pamal KHizan ki manind

gulshan-e-zist ki surat kabhi aisi to na thi

iKHtilafat to the ahl-e-chaman mein lekin

lala-o-gul mein 'adawat kabhi aisi to na thi

pujta hun main inhen apne KHudaon ki tarah

in buton se mujhe nisbat kabhi aisi to na thi

us ke har 'aks se aata hai mujhe KHauf 'jalis'

aaine se mujhe wahshat kabhi aisi to na thi