pesh-pesh the jo kal aashiyan sajaane mein

pesh-pesh the jo kal āshiyāñ sajāne meñ

zikr hī nahīñ un kā ab kisī fasāne meñ

jaan ham ne dī yaaro tab shahīd kahlā.e

mubtalā the tā'na-zan uñgliyāñ kaTāne meñ

manziloñ ne ḳhud aa kar paañv un ke chūme the

lutf jin ko aatā thā kashtiyāñ jalāne meñ

bad-gumāniyāñ pal meñ rishte toḌ detī haiñ

'umr biit jaatī hai fāsle ghaTāne meñ

kar ke koshish-e-paiham thak ga.e sabhī dushman

ho ga.e vo ḳhud baune qad mirā ghaTāne meñ

āñsuoñ kī syāhī se likh kar ik ġhazal yaaro

ho ga.e haiñ shāmil ham 'mīr' ke gharāne meñ

kar rahe haiñ kyoñ mātam ab mirī tabāhī par

the 'farāz' shāmil jo ghar mirā jalāne meñ

pesh-pesh the jo kal aashiyan sajaane mein

zikr hi nahin un ka ab kisi fasane mein

jaan hum ne di yaro tab shahid kahlae

mubtala the ta'na-zan ungliyan kaTane mein

manzilon ne KHud aa kar panw un ke chume the

lutf jin ko aata tha kashtiyan jalane mein

bad-gumaniyan pal mein rishte toD deti hain

'umr bit jati hai fasle ghaTane mein

kar ke koshish-e-paiham thak gae sabhi dushman

ho gae wo KHud baune qad mera ghaTane mein

aansuon ki syahi se likh kar ek ghazal yaro

ho gae hain shamil hum 'mir' ke gharane mein

kar rahe hain kyon matam ab meri tabahi par

the 'faraaz' shamil jo ghar mera jalane mein