peshani-e-mohabbat jhuk jae jis zamin par

peshānī-e-mohabbat jhuk jaa.e jis zamīñ par

ka.abe kā zikr kyā hai bas ho ḳhudā vahīñ par

thā vahshī-e-adā kā naqsh-e-qadam yahīñ par

peshānī-e-malak phir jhuktī na kyoñ zamīñ par

ik umr marte jiite guzrī hai tere chalte

jab miT chalā tabassum bal aa chukā jabīñ par

aflāk par zamīñ hī bhārī rahī hamesha

bālā-e-arsh sājid masjūd thā zamīñ par

hoñ laakh hashr to bhī kam ho na us kī lazzat

donoñ jahān sadqe zālim tirī nahīñ par

rahtā hai yuuñ barābar bīm-o-rajā kā palla

pyārī hañsī laboñ par qātil shikan jabīñ par

mahshar se kyoñ maiñ pūchhūñ dil se na pūchh dekhūñ

sajde kā ye nishāñ hai yā daaġh hai jabīñ par

hoñ laakh hashr to bhī ghaTtī nahīñ kahīñ par

lazzat tirī nahīñ kī sadqe tirī nahīñ par

is gul ke aage dil ne jannat ko daaġh paayā

uf zaḳhm kī bahāreñ dīvāne kī jabīñ par

guzrī hai umr 'beḳhud' rote lahū ke aañsū

fard-e-amal kā dhokā ho kyoñ na āstīñ par

peshani-e-mohabbat jhuk jae jis zamin par

kabe ka zikr kya hai bas ho KHuda wahin par

tha wahshi-e-ada ka naqsh-e-qadam yahin par

peshani-e-malak phir jhukti na kyon zamin par

ek umr marte jite guzri hai tere chalte

jab miT chala tabassum bal aa chuka jabin par

aflak par zamin hi bhaari rahi hamesha

baala-e-arsh sajid masjud tha zamin par

hon lakh hashr to bhi kam ho na us ki lazzat

donon jahan sadqe zalim teri nahin par

rahta hai yun barabar bim-o-raja ka palla

pyari hansi labon par qatil shikan jabin par

mahshar se kyon main puchhun dil se na puchh dekhun

sajde ka ye nishan hai ya dagh hai jabin par

hon lakh hashr to bhi ghaTti nahin kahin par

lazzat teri nahin ki sadqe teri nahin par

is gul ke aage dil ne jannat ko dagh paya

uf zaKHm ki bahaaren diwane ki jabin par

guzri hai umr 'beKHud' rote lahu ke aansu

fard-e-amal ka dhoka ho kyon na aastin par