phailae jab dam hawas ne rasm-e-mohabbat aam hui

phailā.e jab daam havas ne rasm-e-mohabbat aam huī

past huā me.aar vafā kā ik duniyā badnām huī

dil ne kaam liyā āñkhoñ se ḳhāmoshī paiġhām huī

jalvoñ kī kasrat ke aage tāb-e-nazar nākām huī

dekhe haiñ dastūr nirāle ham ne vādī-e-ulfat meñ

rāheñ jab āsān huiiñ to sa.ī-e-talab nākām huī

chaltī haiñ kis kī tadbīreñ khel haiñ sab taqdīroñ ke

shaam kisī kī sub.h meñ badlī sub.h kisī kī shaam huī

mahfil mahfil bāteñ niklīñ kyā kyā charche aam hue

terā adā-e-kam-āmezī kis had tak badnām huī

avval avval vahm-e-davā ne lutf-e-sukūñ barbād kiyā

āḳhir āḳhir dard kī daulat ulfat kā in.aam huī

mahv huā dīdār talab dil aisā un ke jalvoñ meñ

goyā mil kar bhī milne kī baat barā.e-nām huī

kyā jaane kyuuñ dil ne terī yaad kā dāman thaam liyā

majbūrī āġhāz huī jab nākāmī anjām huī

kyā kahiye kis kis kī nazar ne bad-zauqī ko aam kiyā

un kī nazroñ ke hote kyuuñ duniyā ġharq-e-jām huī

fikr-e-ġham-o-ālām 'rishī' hai goyā naam judā.ī kā

un kī mahfil meñ kab dil ko fikr-e-ġham-o-ālām huī

phailae jab dam hawas ne rasm-e-mohabbat aam hui

past hua mear wafa ka ek duniya badnam hui

dil ne kaam liya aankhon se KHamoshi paigham hui

jalwon ki kasrat ke aage tab-e-nazar nakaam hui

dekhe hain dastur nirale hum ne wadi-e-ulfat mein

rahen jab aasan huin to sai-e-talab nakaam hui

chalti hain kis ki tadbiren khel hain sab taqdiron ke

sham kisi ki subh mein badli subh kisi ki sham hui

mahfil mahfil baaten niklin kya kya charche aam hue

tera ada-e-kam-amezi kis had tak badnam hui

awwal awwal wahm-e-dawa ne lutf-e-sukun barbaad kiya

aaKHir aaKHir dard ki daulat ulfat ka inam hui

mahw hua didar talab dil aisa un ke jalwon mein

goya mil kar bhi milne ki baat barae-nam hui

kya jaane kyun dil ne teri yaad ka daman tham liya

majburi aaghaz hui jab nakaami anjam hui

kya kahiye kis kis ki nazar ne bad-zauqi ko aam kiya

un ki nazron ke hote kyun duniya gharq-e-jam hui

fikr-e-gham-o-alam 'rishi' hai goya nam judai ka

un ki mahfil mein kab dil ko fikr-e-gham-o-alam hui