phaili hui hai sari dishaon mein raushni

phailī huī hai saarī dishāoñ meñ raushnī

lekin nahīñ charāġh kī chhāñv meñ raushnī

ab to panapne vaalī haiñ raushan-ḳhayāliyāñ

aa.ī na.ī na.ī mire gaañv meñ raushnī

ik haath dūsre ko sujhā.ī na de magar

ham ne chhupā rakhī hai ridāoñ meñ raushnī

dīn-o-m.āshīyāt-o-siyāsat ke peshvā

zehnoñ meñ tīrgī to adāoñ meñ raushnī

sab log mash.aloñ kī tamannā meñ ḳhaar the

garche paḌī thī apne hī paañv meñ raushnī

'zīshāñ' siyāhiyoñ ke numā.inda bhī haiñ ham

aur ham hī chāhte haiñ atāoñ meñ raushnī

phaili hui hai sari dishaon mein raushni

lekin nahin charagh ki chhanw mein raushni

ab to panapne wali hain raushan-KHayaliyan

aai nai nai mere ganw mein raushni

ek hath dusre ko sujhai na de magar

hum ne chhupa rakhi hai ridaon mein raushni

din-o-mashiyat-o-siyasat ke peshwa

zehnon mein tirgi to adaon mein raushni

sab log mashalon ki tamanna mein KHar the

garche paDi thi apne hi panw mein raushni

'zishan' siyahiyon ke numainda bhi hain hum

aur hum hi chahte hain ataon mein raushni