phenke hue be-kar khilaune ki tarah hun

pheñke hue be-kār khilaune kī tarah huuñ

maiñ baaġh ke ujḌe hue goshe kī tarah huuñ

tū dil meñ utartī huī ḳhushbū kī tarah hai

maiñ jism se utre hue kapḌe kī tarah huuñ

kuchh aur bhī din mujh ko samajhne meñ lageñge

maiñ ḳhvāb meñ dekhe hue raste kī tarah huuñ

saaya sā ye kis chiiz kā hai mere vatan par

maiñ kyuuñ kisī sahme hue qisse kī tarah huuñ

maiñ maañ huuñ satā.ī huī had darja bahū kī

aur beTe pe aa.e hue ġhusse kī tarah huuñ

ho jaa.eñ kabhī jā ke vahīñ sindh kināre

bāteñ koī do chaar jo pahle kī tarah huuñ

ab to kisī mahkār kī yādoñ kā safar hai

aur maiñ kisī bhūle hue qisse kī tarah huuñ

jis meñ koī dar hai na darīcha na makīñ hai

us ghar pe lagā.e hue pahre kī tarah huuñ

kyā hogī talāfī mire nuqsān kī 'aḳhtar'

maiñ qaid meñ guzre hue arse kī tarah huuñ

phenke hue be-kar khilaune ki tarah hun

main bagh ke ujDe hue goshe ki tarah hun

tu dil mein utarti hui KHushbu ki tarah hai

main jism se utre hue kapDe ki tarah hun

kuchh aur bhi din mujh ko samajhne mein lagenge

main KHwab mein dekhe hue raste ki tarah hun

saya sa ye kis chiz ka hai mere watan par

main kyun kisi sahme hue qisse ki tarah hun

main man hun satai hui had darja bahu ki

aur beTe pe aae hue ghusse ki tarah hun

ho jaen kabhi ja ke wahin sindh kinare

baaten koi do chaar jo pahle ki tarah hun

ab to kisi mahkar ki yaadon ka safar hai

aur main kisi bhule hue qisse ki tarah hun

jis mein koi dar hai na daricha na makin hai

us ghar pe lagae hue pahre ki tarah hun

kya hogi talafi mere nuqsan ki 'aKHtar'

main qaid mein guzre hue arse ki tarah hun